Diretora Nasionál Rekursu Umanu, Ministériu Edukasaun Juventude no Desportu, Marcelina Liu. Imajen/facebook.

DILI, 21 janeiru 2021 (TATOLI)–Ministériu Edukasaun Juventude no Desportu (MEJD), liuhosi Diresaun Nasionál Rekursu Umanu (DNRH, sígla portugés) iha ona planu atu hadi’a estatutu profesór kontratadu iha Timor tomak hamutuk na’in 5.203.

Diretora DNRH, Marcelina Liu esplika, hosi númeru ne’e iha profesór na’in 2.000-resin mak hetan oportunidade iha Universidade Nasionál Timor Lorosa’e (UNTL) hodi kontinua sira nia estudu atu bele hetan títulu baxarelatu no lisensiatura tanba seidauk prienxe kritéria.

“Ita nia profesór 2.000-resin mak seidauk prienxe kritéria, tanba ne’e mak agora daudaun sira tuir hela formasaun hodi hasa’e sira nia nível edukasaun,” Marcelina Liu hateten ba jornalista sira iha serbisu fatin Vila Verde, kinta ne’e.

Marcelina Liu fundamenta, bazeia ba baze edukasaun hosi MEJD katak, pelu-menus profesór ida atu hanorin iha eskola ensinu pré-eskolár no ensinu sekundáriu, mínimu nível edukasaun iha grau akadémiku tenki baxarelatu ka lisensiatura.

“Ne’e duni, MEJD fó oportunidade ba profesór kontratadu hirak ne’e, tenki tuir duni formasaun ne’ebé sei konklui iha fulan jullu tinan ne’e, tanba sira iha de’it nível ensinu sekundáriu,” nia subliña.

Bainhira profesór kontratadu hirak ne’e kompleta ona sira nia formasaun, parte DNRH sei halo rekapitulasaun totál ba dadus profesór kontratadu 5.203, hodi hatama proposta ba MEJD atu buka solusaun ba sira nia estatutu ba permanente.

Parte DNRH mós rejista katak, maski profesór 5.203 ninia estatutu kontratadu ka ajente administrasaun, maibé orsamentu ne’ebé uza hodi selu sira, tama iha saláriu no vensimentu, ne’ebé maioria hahú hosi tinan 2014.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here