Vise-Prezidente Parlamentu Nasionál, Maria Angelina Lopes Sarmento. Imajen Tatoli/Egas Cristóvão

DILI, 08 marsu 2021 (TATOLI)—Vise-Prezidente Parlamentu Nasionál, Deputada Maria Angelina Lopes Sarmento, husu ba Governu atu konsidera feto iha kualkér prosesu rekrutamentu.

Notísia Relevante: Mane tenke tane aas no respeita feto nia atividade

“Iha prosesu rekrutamentu ne’e kritéria sira mak presiza tau afirmasaun iha-ne’ebá katak ami fó prioridade ba feto entaun iha-ne’e fó vantajen ba feto. Só ke dalabarak ita-nia dezáfiu mak ne’e, feto sira-ne’ebé aplika iha vaga sira iha administrasaun públika, haree katak mane sira-ne’ebé mak mesak kualifikadu de’it entaun feto sira mós kuafikada mós sira hakiduk ona,” Vise-Prezidente Parlamentu Nasionál ne’e informa ba Agência TATOLI, iha uma fukun PN, segunda ne’e.

Nia fundamenta, situasaun ne’e mosu tanba feto sira sente ladún konfortável ona atu kompete ho mane sira iha prosesu rekrutamentu, dezáfiu ida-ne’e mak dalabarak halo feto sira hakiduk iha persisténsia atu kontinua luta.

“Maibé buat hotu presiza prosesu no esperiénsia feto sira-nian iha nível nasionál bele sai motivasaun di’ak ba feto maluk sira seluk atu nune’e bele atinje objetivu,” nia dehan.

Maske nine’e, nia hateten, feto nia partisipasaun iha vida polítika ne’e aas tebes no ema barak iha mundu apresia ho Timor-Leste, tanba hanesan nasaun kiik maibé bele dehan iha Ázia ne’e 42% kona-ba persentajen feto Timor-Leste nian, enkuantu iha nasaun seluk ema sei luta hela 30%.

“Ba 30% ne’e mós seidauk alkansa, ne’e feto iha polítika no iha Parlamentu Nasionál. Maibé iha nível médiu sira hanesan dirasaun jerál sira, nível munisipál sira no iha suku sira, ita bele dehan sei iha Gap ka iha rai-kuak ida-ne’ebé naruk tebes entre polítiku feto sira iha nível nasionál ho iha baze,” nia dehan.

Vise-Prezidente Parlamentu Nasionál ne’e fó-sai katak, partisipasaun feto nian di’ak ona maibé presiza prenxe feto iha nível hotu-hotu, atu nune’e balansu ne’e iha.

“Sé lae Gap ne’e to’o tiha iha nível nasionál maibé iha klaran mamuk no iha okos mós mamuk hela,” nia subliña.

Notísia Relevante: SEII kontinua promove feto partisipa iha setór oioin

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here