Sekretária Estadu Igualdade no Inkluzaun (SEII), Maria José da Fonseca Monteiro de Jesus. Imajen Tatoli/Dok.

DILI, 06 marsu 2021 (TATOLI)—Sekretária Estadu Igualdade no Inkluzaun (SEII), liuhosi ninia planu no estratéjia kontinua halo advokasia hodi promove feto atu bele partisipa iha setór ekonomia, sosiál, polítika no seluk tan.

“Ita kontinua fó advokasia ba maluk feto-sira, la’ós foin hahú iha VIII Governu, maibé hahú kedan iha Governu dahuluk-nian. Ita halo buat barak ona hodi asegura feto iha aspetu hotu liuliu iha prosesu dezenvolvimentu,” SEII, Maria José da Fonseca Monteiro de Jesus, hateten ba Agência Tatoli iha servisu-fatin Matadouru, Dili, sesta (05/03).

Notísia Relevante : AJTL rekomenda ba jornalista sira promove ‘feto iha karreira’

Oras ne’e daudaun SEII kontinua dezenvolve programa-sira ne’ebé estabelese ona iha Governu dahuluk-nian hanesan halo empoderamentu ekonómiku no fó advokasia ba feto maluk-sira atu asegura sira-nia partisipasaun feto iha vida polítika no foti desizaun.

Programa hirak ne’e kontinua dezenvolve tanba SEII lakohi atu feto-sira kontinua hetan diskriminasaun liuhosi kualkér violénsia.

Alende halo advokasia, SEII mós kontinua programa prevensaun no kombate violénsia hasoru feto, labarik feto, komponente vulneravel seluk iha sosiedade, halo abordajen integradu jéneru serbisu hamutuk ho instituisaun oi-oin, inklui organizasaun sosiedade sivíl iha munisípiu-sira.

“Atu kombate violénsia sira ne’e liuhosi fó asisténsia oioin, fornesimentu servisu oioin ba vítima-sira iha área sosiál, saúde no mós asegura sira-nia asesu ba justisa. Ida ne’e, SEII kontinua halo, maibé klaru problema ida-ne’e kompleksa tanba alvu hosi violénsia mak podér ne’ebé fahe la hanesan iha uma-laran no komunidade nia leet,” Maria José da Fonseca Monteiro de Jesus hateten.

Nia  enkoraja nafatin feto maluk-sira labele hakiduk tanba papél feto importante tebes iha sosiedade.

SEII-nia alvu hosi advokasia ne’ebé durante ne’e halo maka oinsá feto-sira bele prienxe kargu xefia iha administrasaun públika.

“Hahú hosi lei eleisaun suku, SEII iha ona rezolusaun kona-bá grupu traballu jéneru no iha rezultadu lubuk ida ne’ebé ita atinje, hanesan oras ne’e daudaun prosesu ne’ebé la’o iha munisípiu iha selesaun pur méritu ba Prezidente autoridade no Administradór,” nia hateten.

SEII fó ezemplu katak, iha munisípiu Dili feto ida iha valór aas liu bainhira konkorre ba vaga administradór-nian no ne’e hatudu katak rezultadu implementasaun polítika hosi SEII iha duni rezultadu pozitivu.

Notísia Relevante : Rubrika profile iha Timor Post fó importánsia ba feto

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here