Xefe Suku Soba, Francisca Monica de Fátima Soares. Imajen Tatoli/Felicidade Ximenes.

DILI, 08 marsu 2021 (TATOLI)—Xefe Suku Soba, Postu Administrativu Laga, Munisípiu Baucau, Francisca Mónica de Fátima Soares, hateten mane sira iha Timor-Leste tenke tane aas no respeita feto nia direitu ba atividade hotu-hotu ne’ebé feto hala’o.

Notísia Relevante: SEII kontinua promove feto partisipa iha setór oioin

“Ho Loron Mundiál ba Feto ne’e, mane sira iha Timor-Leste presiza no tenke tane aas no respeita feto nia atividade hotu-hotu ne’ebé mak nia hala’o iha família, sosiedade no ba nasaun ida-ne’e,”  Francisca Mónica de Fátima Soares hateten ba Agência TATOLI liuhosi telefónika, segunda ne’e.

Tanba, nia hatutan, liuhosi feto mak iha família no iha nasaun tanba feto jere iha família hanesan dona de casa no iha sosiedade no nasaun feto hanesan jestora no edukadora ba nia oan no ba nia povu.

Nia husu ba organizasaun sira iha Timor-Leste atu hadomi no respeita feto nia diginidade no tenke valoriza sira iha asaun saida de’it.

“Ha’u husu ba organizasaun sira-ne’ebé mak defende no tau-matan ba direitu feto nian katak presiza fó kapasitasaun ba feto sira. Liuliu ami feto sira iha área rurál, nune’e bele eleva sira-nia koñesimentu hodi bele brani kompete ho mane sai lideransa, liuliu kompete iha eleisaun 2023 ne’ebé mai ne’e,” nia hateten.

Nia hateten, tanba agora tama ba desentralizasaun administrativa iha kada Munisípiu, entaun feto mós iha oportudade tenke kompete, nune’e hatudu ba mundu katak feto Timor-Leste mós bele.

Francisca hatutan, atu sai lideransa ne’ebé di’ak mak tenke iha formasaun hodi kapasita feto no hasa’e feto sira-nia abilidade oinsá hamriik iha oin hodi lidera komunidade ida iha sosiedade, munisípiu no nasaun.

“Ho ida-ne’e, ha’u husu ba mane atu respeita no kontinua valoriza no diginifika feto iha asaun saida de’it,” nia sujere.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here