Arsebispu ba Arquidiocese Metropolitana Dili, Dom Virgílio do Carmo da Silva. Imajen Tatoli/António Gonçalves.

DILI, 08 marsu 2021 (TATOLI)—Arsebispu Arkidioseze Metropolitana Dili, Don Virgílio do Carmo da Silva, ohin, deside sei suspende atividade misa diária nian tanba daudaun ne’e mosu kazu COVID-19 ne’ebé iha ona transmisaun lokál iha Munisípiu Dili.

Notísia Relevante: Transmisaun lokál COVID-19, Arsebispu husu Pároku-sira halo vijilánsia  

Ulun boot ba Uma Kreda lokál ne’e foti dezisaun ne’e atu suspende misa tanba bazea ba reuñiaun ekstraordinária Konsellu Ministru, 08 marsu 2021, deside tiha ona Serka Sanitária no konfinamentu obrigatóriu ba Munisipiu Dili, hahó hosi 00h00, 09 marsu to’o 23h59 horas, 15 marsu 2021, proibe atu realiza kualker atividade sira-ne’ebé ho karáter sosiál, kulturál, desportiva no relijioza, ne’ebé bele halibur ema barak.

“Atu bele kontribui ba susesu hosi Serka Sanitária no Konfinamentu Obrigatóriu, tanba ne’e, ha’u hakarak fó hatene no husu ba Reverendu Pároku, Padre sira, relijiozu, relijioza no sarani sira, katak hahú husi 09-15 marsu 2021, ita mós sei suspende misa sira diária, dominikál ba públiku no servisu Kartoriál iha Parókia sira iha Munisípiu Dili de’it,” Don Virgílio do Carmo da Silva hateten liuhosi karta komunikadu ne’ebé Agência TATOLI asesu, segunda ne’e.

Don Virgílio hateten, parókia sira sei implementa orientasaun atu suspende misa mak hanesan parókia sira-ne’ebé halo parte iha Munisipiu Dili mak Atauro, Aimutin, Balide, Becora, Bedois, Catedral, Comoro, Dare, Hera, Metinaro no Motael.

“Mai ita hotu reza husu Maromak nia tulun ho Nain Feto Maria Virgem, Timor nia Liurai Feto no São José, Aman lgreja Universál nia harohan da’et, atu hadook lalais ita hosi moras ne’e,” nia hateten.

Notísia Relevante: Arsebispu seidauk foti desizaun atu hapara atividade eklesiál

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here