Arsebispu Arkidioseze Metropolitana Dili, Don Virgílio do Carmo da Silva, SDB. Imajen/ Egas Cristóvão

DILI, 26 fevereiru 2021 (TATOLI)–Arsebispu Arkidioseze Metropolitana Dili, Don Virgílio do Carmo da Silva, hateten arsebispu seidauk foti desizaun atu hapara atividade eklesiál iha fronteira iha Munisípiu Bobonaro, Covalima, no Rejiaun Administrativa Espesiál Oé-Cusse Ambeno (RAEOA) relasiona ho lockdown ka serka sanitaria.

Don Virgílio do Carmo da Silva hatutan, daudaun ne’e seidauk foti dezisaun tanba sei akompaña nafatin situasaun Governu nian, bainhira lockdown totál ona mak dioseze foin foti desizaun.

“Agora ita kontinua akompaña situasaun Governu nian, bainhira Governu dehan lockdown totál mak ita la’o tuir hapara atividade eklesiál nian. Maibé, agora ita alerta hela seidauk iha desizaun finál ida atu suspende misa. Maibé, ita akompaña bainhira situasaun obriga labele ona mak ita prontu nafatin atu kolabora ho Governu hodi hapara atividade relijioza nian,” Don Virgílio do Carmo da silva hateten ba jornalista sira hafoin kuda ai-kasi iha Jardin Motaiél, Dili, sesta ne’e.

Don Virgílio hatutan, Dioseze Dili nakloke hein bainhira Estadu Emerjénsia (EE) ne’ebé tuir mai ninian ne’e (dala-11) mak dehan atu hapara mak parte igreja halo tuir, tanba desde uluk parte igreja no Governu prontu nafatin iha situasaun dsfisil sempre kolabora malu.

“Tanba, dalan ne’ebé di’ak liu atu prevene mak uma kreda nakloke atu kolabora ho meiu saida de’it. Maibé, agora sei haree progresu ninian hanesan tanba ita hotu hatene katak momentu ne’e Dioseze Maliana mak to’o tempu ida-ne’e, sira sei laiha misa tanba ho COVID-19 ne’ebé espalla iha Bobonaro no Covalima ninian,” nia dehan.

Tanba ne’e, Don Virgílio hateten, kona-ba selebrasaun santa misa mós sei depende hotu ba sitausaun COVID-19 ninian, bainhira COVID-19 ne’ebé tinan ne’e iha misa ka laiha misa depende de’it.

“Kona-ba selebrasaun santa misa, ita depende ba situasaun COVID-19 ninian. Se COVID-19, haree katak nia mai ameasa duni besik liután mai, pasiénsia, tinan kotuk ita la selebra paskua, tinan ne’e mós seidauk hatene selebra ka la selebra. Ne’ebé, ita hotu reza, nune’e labele akontese. Maibé, akontese ita prontu. Finalidade importante mak ita hakarak evita moras ne’e labele atu da’et liuliu labele da’et liután iha ita-nia rain. Ida-ne’e mak ita hotu nia esforsu,” nia dehan.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here