Arsebispu Arkidioseze Dilii, Don Virgílio do Carmo da Silva, SDB. Imajen TATOLI/Egas Cristóvão

DILI, 06 marsu 2021 (TATOLI)—Arsebispu Arkidioseze Dili, Don Virgílio do Carmo da Silva, SDB, husu ba Pároku-sira atu halo vijilánsia iha parókia ida-idak, hodi hamoris liután komunikasaun ho parte hotu-hotu, tanba oras ne’e daudaun iha ona transmisaun lokál iha Munisípiu Covalima.

“Husu Pároku-sira atu koordena nafatin ho parte seguransa Polísia Nasionál Timor-Leste, Ekipa Saúde Munisípiu no Postu Administrativu, atu atualiza informasaun-sira kona-bá COV.SARS.2. Bainhira parte saúde identifika COV.SARS.2 iha ita-boot sira-nia fatin, husu atu imediatamente foti medida ne’ebé sériu ho koñesimentu Amu Bispu-nian,”  Don Virgílio hateten liuhosi sirkulár ne’ebé fó sai iha sábadu  ne’e.

Notísia Relevante : Arkidioseze Dili ‘konsulta’ ho KMD kona-ba rekizitu sira EE da-XI

Iha sirkulár ne’e mós Arsebispu husu Pároku-sira atu multiplika ka habarak Misa Dominikál iha Igreja-sira, nune’e bele evita partisipasaun sarani-nian ho kuantidade boot iha Misa.

Hosi parte Arkidioseze fó-hanoin  nafatin ba Pároku-sira atu kontinua dezinfeta Igreja Parokiál no Kapela-sira, halo tuir nafatin  orientasaun-sira hosi Ministériu Saúde (MS), Organizasaun Mundiál Saúde (OMS), fase-liman, uza máskara no mantein distansiamentu sosiál.

“Husu atu temporariamante suspende konfesaun jerál ka konfesaun ne’ebé envolve ema barak, liu-liu iha tempu kuarezma nu’udár preparasaun ba festa Páskua. Evita reuniaun-sira ne’ebé la nesesáriu no envolve ema barak,” Don Virgílio hateten.

Nai-ulun ba Uma Kreda lokál ne’e, husu kompriensaun sarani-sira katak labele kaer liman, bensa-liman, hakuak-malu no rei-malu antes ka depois misa.

“Harohan ba Maromak bele buat hotu atu hadook ita hosi susar-sira ne’e hotu,” Arsebispu Arkidioseze Dili ne’e haktuir iha sirkulár ne’e

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here