DILI, 07 marsu 2021 (TATOLI)–Sala Situasaun Sentru Integradu Jestaun Krize (CIGC, sigla portugés) hamutuk ho Ministériu Saúde anunsia kazu pozitivu COVID-19 rua ne’ebé deteta hosi teste masál ba abitante iha área BTN II Tasi-tolu, aldeia Terra Santa, suku Madohi, postu administrativu Dom Aleixo, munisípiu Dili.
Ho nune’e, Sala Situasaun CIGC deside blokeia temporária movimentu populasaun sira iha aldeia Terra Santa.
Koordenadór Forsa-Tarefa ba Prevensaun no Mitigasaun surtu COVID-19 iha Timor-Leste, hosi Sala Situasaun CIGC, Rui Maria de Araújo, hateten razaun blokeia temporária movimentasaun sidadaun iha aldeia ne’e tanba rezultadu restreiu ba kontaktu, deteta sidadaun balun pozitivu COVID-19.
Desizaun blokeia área sira ne’e, hetan ona koñesimentu Primeiru-Ministru, Taur Matan Ruak, ne’ebé hanesan Komandante Operasionál Sala Situasaun CIGG.
“Kalan ne’e, Sala Situasaun koordena ona ho autoridade seguransa sira atu temporáriamente blokeia aldeia Terra Santa hahú hosi Rate Raikotu ninian to’o rohan. Tanba ne’e husu populasaun hakmatek lai iha uma-laran, labele movimentu tun-sae hodi fó tempu ba ekipa saúde buka fali kontaktu besik hosi sira-ne’ebé deteta pozitivu,” Koordenadór Forsa-Tarefa informa liuhosi konferénsia imprensa ne’ebé realiza iha Sentru Konvensaun Dili (CCD, sigla portugés), domingu ne’e.
Notísia relevante: COVID-19: pozitivu lima hosi Covalima, ida hosi Baucau
COVID-19, pesoál Saneamentu Dili submete ba teste swab
Restreiu kontaktu iha bairru BTN II Tasi-tolu, foin deteta sidadaun na’in-rua pozitivu ohin lorokraik.
“Sidadaun na’in-rua hanesan viziñu ho kazu ida-ne’ebé deteta iha Baucau. Hosi amostra 289 ne’ebé foti iha bairru ne’e, deteta na’in-rua mak pozitivu no ekipa sira halo ona restreiu ba kontaktu sira besik ho kazu pozituvu,” nia akresenta.
Sidadaun pozitivu serbisu iha ministériu balun
Maski la fó sai identidade sidadaun ne’ebé pozitivu COVID-19, maibé tuir Koordenadór Forsa-Tarefa, sidadaun rua ne’e serbisu iha administrasaun públika iha ministériu balun, tanba ne’e ekipa sei halo vijilánsia másima.
“Hahú ohin kalan, Sala Situasaun Sentru Integradu Jestaun Krize hakarak apela ba populasaun tomak iha Dili laran atu kalma, labele pániku, tur hakmatek, tanba aban dadeer se laiha nesesidade atu halo movimentu sai,” nia apela.
Iha segunda (08/03), CIGC sei hato’o proposta konkreta ba Konsellu Ministru atu foti desizaun kona-ba medida ne’ebé sei foti ba iha munisípiu Dili.
Restreiu kontaktu ne’ebé halo iha sábadu (06/03) ba amostra 289, hatudu katak na’in-rua pozitivu no seluk negativu, maski nune’e ekipa saúde buka tan kontaktu besik ho kazu pozitivu.
Teste masál ne’ebé halo inklui ba pesoál saneamentu munisípiu Dili hamutuk na’in-100 tanba identifika hirak ne’e ninia kaben pozitivu COVID-19.
Enkuantu pesoál ne’ebé ninia kaben konfirmadu, hamutuk ho família submete ona ba konfinamentu obrigatóriu.
Ho nune’e, kazu konfirmadu desde deteta dahuluk iha Timor-Leste iha marsu 2020 to’o agora hamutuk 122 no hosi númeru ne’e, na’in-98 mak rekuperadu no kazu ativu hamutuk 28 sei baixa iha sala izolamentu Vera Cruz.
Hosi kazu pozitivu COVID-19 to’o oras ne’e, na’in-92 deteta iha Dili, Covalima 17, Bobonaro neen no Baucau ida.
Ema ne’ebé submete ba teste to’o agora hamutuk 22.651, ne’ebé hosi númeru ne’e iha 22.054 mak negativu no hein rezultadu 475.
Jornalista: Antónia Gusmão
Editora: Julia Chatarina