Teste swab COVID-19. Imajen/Google

DILI, 06 marsu 2021 (TATOLI) – Ekipa Vijilánsia Sentinela hosi Ministériu Saúde, sábadu ne’e,  iha repartisaun Prezidente Autoridade Munisípiu Dili, halo teste swab bá pesoál  Saneamentu Munisípiu Dili hamutuk na’in-100 tanba identifika sira-nia kolega servisu hamutuk balun nia ferik-oan pozitivu COVID-19.

Fatin tau amostra teste swab nian. Imajen/Google

Administradór Postu Administrativu Don Aleixo, Tomas Barros, hateten teste swab COVID-19 ne’e hodi foti amostra hosi traballadór 100 para identifika sira-nia kondisaun saúde  no halo prevensaun ba propagasaun  peste letál ne’e.

“Ita hotu hatene ona katak iha pesoál traballadór ida mak agora hamutuk ho ninia família submete iha konfinamentu obrigatóriu ka kuarentena tanba akontese kazu pozitivu ba pesoál limpeza ida  ninia espoza,” Tomas Barros informa.

Tuir nia koñesimentu, durante hala’o servisu limpeza iha sidade Dili,  traballadór sira ne’e mak sempre hamutuk hela de’it. Tanba ne’e mak parte Munisípiu Dili husu ba ekipa konjunta MS atu apoiu teste swab ba pesoál Saneamentu atu bele hatene sira ninia kondisaun saúde.

Administradór Postu Administrativu Don Aleixo  ne’e hatutan teste ne’e la’ós obrigatóriu, maibé husu kooperasaun pesoál Saneamentu sira nian atu bele evita propagasaun COVID-19 iha sosiedade nia leet.

Definisaun teste swab

Teste swab ne’e halo atu foti amostra (sampel) cairan hosi inus-laran ka kakorok-laran.  pesoál saúde sei hatama ferramenta espésie atu hanesan cotton bud ho medida boot-uitoan ba kakorok-laran no inus-laran. ho nune’e, amostra Swab ne’e hatama ba fatin espesífiku (tabung khusus) no taka halo metin didi’ak ho kuidadu tebes.

Amostra ne’ebé foti hosi teste swab ne’e haruka ba laboratóriu nasionál atu halo analiza liuhosi téknika PCR.

PCR maka tékniku analiza ne’ebé halo kombinasaun DNA ka RNA ne’ebé hetan virus. DNA ka RNA ne’ebé iha amostra teste swab ne’e sei halo replikasaun ka halo barak depois kombina fali ho estrutura DNA SARS-COV2 nu’udar template.  Se iha indikasaun amostra pasiente ida nian hanesan ka han-malu (cocok) ho estrutura DNA SARS-CO2, maka pasiente ne’e kategoria iha sintoma ka pozitivu COVID-19.  Se la cocok, maka pasiente negativa.

Jornalista    : Tomé Amado

Editór          : Francisco Simões

HAKEREK NO HATÁN

Please enter your comment!
Please enter your name here