Membru Unidade Polísia Fronteira (UPF) no Médiku-sira halo seguransa másimu ba pasiente COVID-19, feto ida ne’ebé fila hosi toos ba nia-rezidensia iha Aldeia, Suku Belulik Leten, Postu Administrativu Fatumean. Imajen Tatoli/Eugénio Pereira.

DILI, 05 marsu 2021 (TATOLI)— Sala Situação, Centro Integrado Gestão de Crises (SS-CIGC sígla portugés), liu hosi Koordenadór Forsa-Tarefa ba Prevensaun no Mitigasaun Surtu COVID-19, Rui Maria de Araújo, atualiza hikas kazu pozitivu foun na’in-ne’en, kompostu hosi na’in-lima mai hosi Munisípiu Covalima no na’in-ida detekta iha Munisípiu Baucau.

Rui Maria de Araújo  esplika, hosi ‘cluster’ Klauhalek iha loron 3 to’o 4 marsu 2021, deteta tan kazu konfirmadu na’in-lima, na’in-tolu iha aldeia Baleo Ki’ik, no na’in-rua iha aldeia Maneki’ik.

Notísia Relevante:COVID-19 hosi Fatumean, rejista tan kazu foun haat

“Aldeia rua ne’e viziñu ho aldeia Klauhalek no pertense hotu ba Suku Belulik Leten.  Hamutuk hotu ‘cluster’ Klauhalek iha kazu konfirmadu na’in 12. Iha ‘cluster’ Onu-laran, to’o ohin seidauk deteta tan kazu foun,” Rui Maria de Araújo fó-sai liuhosi konferénsia imprensa iha Centro Convenções Dili (CCD), sesta ne’e.

Hosi kazu konfirmadu foun na’in-lima ne’e, nia hatutan, na’in-tolu estudante Eskola Bázika Centrál Fatumea.

Kazu konfirmadu hirak ne’e, oras ne’e evakua ona mai Dili, no ekipa konjunta saúde munisipiu Covalima, hamutuk ho Sentru Saúde Fatumea, nafatin buka-tuir kontaktu sira hotu, inklu estudante sira Eskola Bázika Centrál Fatumea.

Kona-bá kazu konfirmadu ida ne’ebé ekipa SS -CIGC detekta iha Baucau iha 2 marsu 2021, ema ne’e halo viajen hosi Dili ba Baucau iha dia 1 marsu, ho bus naran Mabenifa, xapa matríkula 36-806, to’o iha Baucau tuku 8:00 kalan.

Iha dia 2 marsu, viziñu-sira informa ekipa konjunta saúde Baucau katak, ema ne’e kleur ona la hela iha Baucau, posivelmente halo viajen ba fatin kontaminadu ruma no husu atu halo teste.

Ekipa konjunta foti amostra, iha loron ne’e kedan ho ema ne’e rasik-ninia konsentimentu no rezultadu hosi amostra ne’e, hatudu pozitivu, maibé pozitivu ho CT (cycle threshold) 42,5.

“Ida ne’e signifika, nia infetadu duni ho virus SARS-CoV-2, maski nia iha ona faze rekoperasaun, no probabilidade atu nia hada’et tutan ba ema seluk, ki’ik liu, kompara ho, pur ezemplu karik nia iha CT 37 mai kra’ik,” médiku ne’e esplika.

Iha loron 4 marsu, ekipa saúde repete hikas análize hodi konfirma ninia CT, maibé rezultadu ida ne’e hatudu negativu no rezultadu ida ne’e konfirma katak, kazu ida ne’e iha duni prosesu rekoperasaun.

Maski ho rezultadu ida hanesan ne’e, ekipa saúde deside atu foti amostra hosi ema hotu ne’ebé kontaktu-besik ho nia iha Baucau, no mós ninia kontaktu-besik iha fatin ne’ebé nia hela iha Dili, iha BTN II Tasitolu, Aldeia Terra Santa, Suku Madohi, Don Aleixo, munisípiu Dili.

“Hamutuk hotu iha ema na’in 17 (9 iha Baucau, 8 iha Dili) ne’ebé konsideradu kontaktu besik, ho kazu ida ne’e maka halo ona teste, rezultadu hatudu negativu hotu kedan,” nia subliña.

Maski negativu hotu kedan, sira sei nafatin iha kuarentena, hodi hein tempu ne’ebé nesesáriu atu repete teste dala-ida tan.

Parte SS -CIGC simu informasaun hosi kazu konfirmadu ida ne’e ninia-membru família-sira hateten katak, sira ida mós la halo viajen sai hosi Timor-Leste, no la halo mós viajen ba fatin ne’ebé foin daudaun iha hela Serka Sanitária, hanesan Munisipiu Bobonaro ho Covalima.

Ekipa konjunta saúde iha Munisipiu Baucau ho Munisípiu Dili sei nafatin buka-tuir kontaktu sira hotu-hotu, hodi bele estabelese ligasaun entre kazu foun ida ne’e ho posível fontes de infesaun.

Dadus atuál ohin-nian, kazu foun 6, kazu rekoperadu 4, kazu ativu 25, ema tama hosi fronteira terrestre hosi 1 to’o 5 marsu liu dalan regulár hamutuk 57, liu dalan irregulár ne’ebé autoridade-sira deteta hamutuk nain-ida, sira hotu tama iha kuarentena.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here