Majór Jenerál, Falur Rate Laek, Imajen/Media F-FDTL.

DILI, 02 marsu 2021 (TATOLI)—Majór Jenerál, Falur Rate Laek,  hateten reflesaun Loron Nasionál Veteranu ba tinan ida-ne’e mak joven sira agora nian tenke muda mentalidade no matenek, tanba juventude agora moris iha mundu kompetisaun ne’ebé makaas.

Notísia Relevante: Riak Leman: “Veteranu sira labele sobu fali Timor-Leste”  

“Nu’udar joven tenke muda mentalidade atu Timor ne’e ba oin. Tanba, uluk dehan isin maubere no klamar maubere entaun agora mós tenke muda mentalidade katak isin Timor no klamar Timor”, Falur Rate Laek hateten ba Agênsia TATOLI hodi hato’o ninia reflesaun no lia-tatoli ba juventude kona-ba loron Nasionál veteranu ne’ebé kada tinan selebra iha loron 03 marsu, iha edifísiu Fundasaun Falur Rate Laek, Faról, segunda ne’e.

Veteranu ne’e hatutan, nia parte admira joven sira agora nian, tanba akaba estudu iha universitáriu hodi estuda siénsia no teknolójia, maibé barak mak fila-fali hatudu prátika hahalok animista, ne’e ladi’ak.

Nia kompara juventude agora ho uluk iha diferénsa tebes, uluk joven sira maske ho kuarta klase de’it maibé ema reseu no tauk, maibé agora barak akaba estudu iha universidade sai lisensiatura-doutoramentu (S2-S3) maibé hahalok la tuir hanesan ema matenek.

“Ami uluk ne’e ho kuarta klase de’it maibé tama komunidade nia leet ema haree ne’e dehan ema duni. Maibé, joven agora universidade tiha mak ba lanu fali iha dalan. Loloos ne’e juventude agora tenke matenek no haree matenek ne’e  hosi nia hatais, tuur, la’o, no ninia hahalok tomak”, nia dehan.

Nia haktuir, juventude uluk atu halo funu ne’e hateten haluha buat hotu ne’ebé joven hakarak hodi fila-fali ba knua hamutuk ho inan-aman halo to’os no natar, hodi halo funu. To’o juventude balu dehan, presiza liman laran ne’e tenke mahar halo funu ne’e ba oin.

Entretantu iha reflesaun ba komemorasaun loron Nasionál veteranu ne’ebé selebra iha kada loron 03 marsu ne’e, Majór Jeneral, Falur Rate Laek, hato’o mós mensajen no husu ba ninia veteranu maluk sira iha Timor laran tomak tenke kalma, rona malu no fiar malu hodi Timor-Leste ne’e ba oin.

“Ha’u-nia mensajen ba ha’u-nia maluk veteranu sira tenke kalma no orienta malu nafatin, fiar malu no rona malu nafatin, labele halo problema oioin, maibé hadi’a ita-nia saúde sira ne’e hodi kontribui nafatin ba rai ida-ne’e”, nia hateten.

Notísia Relevante: COVID-19, Loron Nasionál Veteranu la komemora

Governu sei responsabiliza haloot restu mortál iha munisípiu

Kontribuidór: Memensio Sequeira Freitas

Editór: Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here