DILI, 01 marsu 2021 (TATOLI)—Prezidente Konsellu Kombatente Libertasaun Nasionál (KKLN), Vidal de Jesus “Riak Leman”, hateten restu mortál sira-ne’ebé daudaun ne’e iha hela osoáriu munisípiu balun, Governu hahú halo ona konstrusaun atu haloot.
Ntísia Relevante: Riak Leman: “Veteranu sira labele sobu fali Timor-Leste”
“Konforme sosializasaun ne’ebé Sektretáriu Estadu Asuntu Kombatente Libertasaun Nasionál (SEAKLN) halo no ha’u mós ko’alia ona ho nia dehan katak restu mortál sira ne’ebé rai hela iha iha osoáriu munisípiu sira-ne’e, balu hahú halo ona konstrusaun atu haloot mate ruin sira-ne’e, maibé depende mós ba orsamentu,” Vidal de Jesus “Riak Leman” hateten ba Agênsia TATOLI realasiona ho komemorasaun loron Nasionál veteranu ne’ebé kada tinan selebra iha loron 3 marsu, iha nia knaar fatin Obrigado Barrack, Matadouru, segunda ne’e.
Riak Leman hatutan, Estadu hahú ona konstrusaun atu haloot restu mortál sira iha munisípiu balun, maibé depende mós ba orsamentu, tanba ho orsamentu ne’ebé natoon entaun sei halo uluk ba munisípu balun de’it no bainhira orsamentu iha mak foin haree ba munisípiu hotu.
Nia haktuir, kona-ba restu mortál sira-ne’ebé daudaun ne’e maluk veteranu balun rai iha rezidénsia, la’os veteranu Cornélio Gama “L-7” de’it mak halibur mate-ruin maibé iha veteranu sira seluk iha munisípiu balun mós rekolla restu mortál hotu no seidauk haloot iha fatin dignu.
“Munisípiu Ainaro mós ita-nia maluk veteranu balun ne’ebé halibur hotu restu mortál, ne’ebé aban bainrua Estadu nia dever mak atu organiza halo semitériu ka fatin ruma atu haloot hotu,” nia dehan.
Ko’alia kona-ba semitériu ne’ebé atu haloot restu mortal sira-ne’e, nia dehan, ema hotu-hotu hanoin Jardim dos Herois Metinaro de’it mak semitériu ida-ne’ebé valór liu maibé lae, tanba atu dehan hakoi iha ne’ebé de’it hanesan hotu.
“Ha’u hanoin, ita hotu, veteranu bainhira mate bele hakoi iha jardin veteranu ne’ebé de’it. Tanba hakoi iha ne’ebé de’it mós, dekretu Lei Prezidente nian bele lee iha fatin ne’ebé hakohi no bele haruka F-FDTL tiru kilat sa’e ba loron nafatin. Hakohi iha ne’ebé mós kontinua veteranu nafatin, tanba istória ne’e hakerek iha surat-tahan la’ós hakerek iha rate,” nia esplika.
Jornalista: Arminda Fonseca
Editór: Cancio Ximenes
