Riak Leman (liman kuana) no Falur Rate Laek (liman karuk) gerilla iha ai-laran. Imajen/Espesial.

DILI, 01 marsu 2021 (TATOLI)—Prezidente Konsellu Kombatente Libertasaun Nasionál (KKLN), Vidál de Jesus “Riak Leman”, hato’o lia-tatoli ba veteranu sira tenke iha unidade metin no labele iha hanoin atu sobu fali Timor-Leste, tanba independénsia ne’ebé hetan liuhosi funu no prosesu ne’ebé naruk mak foin harii Estadu.

Notísia Relevante: COVID-19, Loron Nasionál Veteranu la komemora

“Iha ita-nia konstituisaun Repúblika Demokrátika Timor-Leste (K-RDTL) hateten veteranu sira-nia papél mak asesu pás no estabilidade ba nasaun ida-ne’e. Tanba ne’e mak se veteranu sira mak halo funu harii nasaun ida-ne’e, ita veteranu duni mak tenke unidade atu labele sobu fali Nasaun ida-ne’e,” Riak Leman hateten ba Agência TATOLI relasiona ho komemorasaun loron Nasionál veteranu ne’ebé selebra iha kada loron 3 marsu, iha nia knaar fatin, Obrigado Barrack, Matadouru, segunda ne’e.

Nia dehan, veteranu sira tenke kria unidade metin tanba liuhosi funu naruk mak TL hetan ninia Indepedénsia hodi harii nasaun ne’e, hodi bele iha Prezidente Repúblika rasik, Parlamentu Nasionál, Governu, no iha Tribunál rasik ne’e, hatudu katak nasaun TL harii ne’e nu’udar produtu ida-ne’ebé mai hosi veteranu sira.

Aleinde ida-ne’e, nia husu no tatoli ba ba foinsa’e sira atu la’o tuir nafatin veteranu sira-nia ain-fatin, tanba molok nasaun ne’e hamriik ema mate rihun atus rua-resin mak hodi salva rai ida-ne’e hosi kolonialista sira-nia ukun.

“Timor-Leste nia luta ne’e hanesan osan-mean ida. Tanba ne’e, ita (timoroan) rai buat hotu-hotu ba kotuk hodi kuidadu liuhosi rona malu, fiar malu, atu ita la’o ba oin nafatin,” nia hameno.

Tanba, nia dehan, nasaun ida atu halo mudansa ne’e lori tempu naruk, maibé atu sobu nasaun ne’e iha minutu ida de’it mós nasaun ne’e bele rahun. Tanba ne’e, nia husu ba joven sira hanesan kontinuadór ba rai ida-ne’e, tenke asegura nasaun Timor-Leste ho di’ak.

“Nasaun ida ita atu hadi’a ka halo dezenvolvimentu lori tempu, maibé atu sobu minutu ida rua de’it ne’e bele. Tanba ne’e mak husu ba joven sira no povu Timor-Leste tomak tenke metin hodi asegura pás no estabilidade ba rai ida-ne’e nian. Tanba, funu hotu ona. Agora, tempu ba joven sira luta ba dezenvolvimentu nasaun nian,” nia tatoli ba  foinsa’e sira.

Jornalista: Arminda Fonseca

Editór: Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here