Primeiru-Ministru, Taur Matan Ruak hamutuk ho membru Governu diskute pedidu renovasaun deklarasaun EE ba -dala XI husi Prezidente Repúblika, iha sala plenária PN, segunda (01/03). Imajen TATOLI/Egas Cristóvão.

DILI, 01 marsu 2021 (TATOLI)—Reprezentante Povu iha uma fukun Parlamentu Nasionál, husu Governu atu fó intervensaun urjénsia ba folin foos ne’ebé sa’e derrepente iha Covalima tanba komunidade iha munisípiu refere enfrenta hela serka sanitária hodi prevensaun ba surtu COVID-19.

Notísia Relevante: Forsa Unidade Territoriál 150 destaka iha Covalima

Membru Parlamentu Nasionál, Deputadu Alexandrino Cardoso, hateten to’o ikus mai ema hotu arrepende katak COVID-19 ne’e iha duni la’ós politizasaun.

Nia subliña, lockdown iha Munisípiu Covalima no Bobonaro tanba kauza hosi surtu COVID-19 maibé haree ba nesesidade bázika ne’ebé oras ne’e folin sa’e makaas.

“Folin foos iha Postu Administrativu Tilomar ne’e, kilógrama 25 ne’e ho kustu $20, iha Fatumean $17, iha Fatululik $18, Fohorem $17, Zumalai, Maukatar no Suai Vila $16. Kioske sira-ne’e laiha ona stoke, lockdown totál entaun atividade paradu. Komunidade agora halerik ba ai-han,” Deputada Bankada FRETILIN ne’e levanta liuhosi debate estensaun EE XI iha plenária, Parlamentu Nasionál, segunda ne’e.

Tanba ne’e, nia husu ba VIII Governu Konstitusionál atu bele buka solusaun ho urjénsia ba ba foos ne’ebé sa’e derrepente ne’e.

Nia rekomenda ba Governu atu koloka foos ho tolelada rihun 27 iha Sentru Lojístika Nasionál (CLN-sigla portugés) atu halo intervensaun rápida ba iha merkadu.

Entretantu, Deputada Carmelita Caetano Moniz, fó apresiasaun ba relatóriu hosi Sentru Integradu no Jestaun Krize (SIJK) ne’ebé aprezenta iha Parlamentu Nasional.

“Maibé, ha’u hakarak husu Governu,  ita aplika tiha ona serka sanitária maibé komunidade sira laiha ai-han. Kuandu aplika iha Postu Aministrativu Fatumean, Be Lulik Leten, sira kuaze la ba vizita malu no kioske sira taka. Sira la asesu ba kualkér nesesidade. Ha’u laran moras, ema la ba asesu ba merkadu. Komunidade sira ne’e susar tebes,” Deputada Bankada CNRT ne’e fó hanoin ba Governu.

Notísia Relevante: Povu Fatumean komesa enfrenta menus ai-han

Jornalista: Evaristo Soares Martins

Editór: Cancio Ximenes

 

HAKEREK NO HATÁN

Please enter your comment!
Please enter your name here