Forsa Unidade Territoriál kompostu hosi Unidade Patrullamentu Fronteira (UPF) ho F-FDTL hala’o operasaun intensivu iha liña fronteira Munisípiu Covalima. Imajen Tatoli/Eugénio Pereira

COVALIMA, 01 marsu 2021 (TATOLI)- Atu asegura desizaun serka sanitária ka lockdown iha Munisípiu Covalima, maka Estadu liuhosi Sala Situasaun Sentru Integradu Jestaun Krize (SS-CIGC) destaka membru Forsa Unidade Territoriál na’in-150 iha area jurisdisaun Covalima nian.

Serka sanitária obriga abitante sira iha area jurisdisaun Covalima nian atu hakmatek iha ida-idak nia uma no kumpre ba regra saúde públiku, tanba deteta ona transmisaun lokál peste letál COVID-19 iha Covalima.

Notísia Relevante : MS rejista tan ema rua pozitivu COVID-19, pasiente ida rekuperadu

Forsa Unidade Territoriál; UPF ho F-FDTL hala’o operasaun intensivu iha liña fronteira Munisípiu Covalima. Imajen Tatoli/Eugénio Pereira

Dadus ikus ne’ebé haktuir hosi Sala Situasaun Sentru Integradu Jestaun Krize (SS-CIGC), domingu (28/02), katak pasiente pozitivu COVID-19 hosi Covalima rejista ona na’in-10.

Ekipa Vijilánsia no Epidemolojia ho Laboratóriu Saúde identifika pasiente sira pozitivu COVID-19 ne’e liuhosi sira-nia amostra screening masál ne’ebé hala’o hosi loron 16  to’o 24 fevereiru, no kontinua halo screening masál  iha Covalima.

Daudaun ne’e iha ona transmisaun lokál ka nakda’et iha Aldeia Klauhalek, Suku Belulik Leten, Postu Administrativu Fatumean no Aldeia Onu-Laran, Suku Maudemu, Postu Administrativu Tilomar, Munisípiu Covalima. Tanba ne’e, hakarak ka lakohi tenke submete ba serka sanitária no kumpre regra saúde públiku atu evita kazu pozitivu nakda’et  barak babeibeik no prejudika povu nia vida.

Regra saúde públiku maka fase liman ho sabaun beibeik, uza máskara, evita halibur malu iha fatin ida ho ema barak, mantein distánsia fízika, evita kumprimenta malu ho kontaktu fíziku hanesan rei-liman ka rei-malu ho ema seluk.

Ho preokupasaun sira kuidadu povu hosi propagasaun COVID-19, SS-CIGC destaka Forsa Unidade Territoriál kompostu hosi Unidade Patrullamentu  Fronteira (UPF), Unidade Espesiál Polísia (UEP/COE) ho FALINTIL-Forsa Defeza Timor-Leste (F-FDTL) hamutuk elementu na’in-150  iha Covalima no balun koloka reforsa seguransa iha liña fronteira terrestre Tilomar, Fatumean, Fohorem no Fatululik.

Misaun forsa sira ne’e atu intensifika patrulla iha dalan sira ne’ebé baibain abitante sira uza tama-sai ho klandestinu ka ilegál ka koñesidu ho lian Indonézia “jalur tikus” atu identifika movimentu klandestinu sira ne’ebé poténsia ba importa SARS-CoV-2, hosi nasaun viziñu Indonézia.

Informasaun ne’ebé ofisial saúde no SS-CIGC rekolla katak COVID-19 iha Covalima nu’udar virus importadu hosi Atambua, Provínsia Nusa Tenggara Timur (NTT), Indonézia, liuhosi abitante Timoroan balun ne’ebé hala’o viajen klandestinu tama-sai pontu entrada Timor-Leste.

UPF ho F-FDTL halo operasaun intensivu iha fronteira Covalima. Imajen Tatoli/Eugénio Pereira

Iha loron 22 fevereiru 2021, ekipa Forsa Unidade Territoriál; UPF ho F-FDTL  kompostu hosi membru na’in-30 lidera hosi Komandante F-FDTL Postu Tilomar, Tenente Amaro Abel Guterres ho Segundu Komandante Kompañia Bravo UPF Covalima, Sarjentu Xefe Norberto Cardoso,  halo patrullamentu intensivu iha área “jalur tikus” ne’ebé identifika ona nu’udar fatin risku ba ema halo movimentu no tranzasaun ilegál.

Molok patrullamentu, Komandante F-FDTL Postu Tilomar, Tenente Amaro Abel Guterres, introdús misaun destakamentu Unidade Territoriál atu asegura seguransa iha Covalima hosi viajen ilegál durante implementa Estadu Emerjénsia.

Patrullamentu intensivu  la’o-ain hahú  hosi Postu F-FDTL Tilomar, tuku 3:00 madrugada ho distánsia kilómetru 21, no route operasaun hosi área Wala ba Tuanatar, Manai, Wesei, Wetaba to’o área  fronteira Salele baliza ho Mota Masin Indonézia nian.

Área sira ne’ebé mensiona  iha dalan sanak ka fatin ilegál 30-resin ne’ebé abitante rai-rua (Covalima ho Atambua) halo tranzasaun kontra bandu  no kontaktu fíziku hodi fó prejuizu ba Estadu luta kontra peste letál COVID-19.

Komandante F-FDTL Postu Tilomar, Tenente Amaro Abel Guterres, ba jornalista sira hateten, patrullamentu ne’e hala’o beibeik hodi satan kualkér movimentu ne’ebé fó risku no ameasa ba povu no Estadu Timor-Leste.

“Ita nia patrullamentu ida ne’e ho objetivu atu redús no impede movimentu ilegál ne’ebé tama iha ita nia fronteira. Ita hotu hatene maski ita halo kontrolu, maibé ita-nia povu no povu Indonézia rasik dala-ruma halo nafatin movimentu ilegál. Ezemplu, ita halo seguransa iha kalan, sira tama iha loron, no ita halo seguransa iha loron, sira tama iha kalan,” Tenente Amaro Abel Guterres haktuir situasaun operasaun iha terrenu.

Operasaun intensivu UPF ho F-FDTL iha fronteira Munisípiu Covalima. Imajen Tatoli/Eugénio Pereira

Durante patrullamentu, membru forsa rua enfrenta sasidik (obstákulu/hambatan) no sasadik (dezafiu/tantangan) oioin iha terrenu, maibé sira kontinua hatudu sira-nia responsabilidade boot atu satan povu no nasaun RDTL hosi ameasa COVID-19.

Iha tempu kalan, membru sira uza de’it lámpada no lampu telefone hodi leno dalan fó naroman hodi hakat tama-sai tahu-laran, duut-laran, ai-laran tuan, mota-laran ho foho-lolon naruk,  ne’ebé bele fó risku mós ba sira-nia vida bainhira enfrenta dezastre.

Zona patrullamentu ba dalan sanak ilegál ne’ebé baibain abitante sira hosi Covalima ho Atambua halo tranzasaun ilegál iha ai-laran tuan, foho lolon no mota-laran,  ho distánsia ne’ebé dook hosi ema-nia futar matan.

Ho kondisaun fatuk-kro’at ho fatuk meik barak halo membru operasaun UPF no F-FDTL  balun nia sapatu naklees, no balun fali kalsa naklees, maibé sira la hakiduk,  tane aas fiar hosi Estadu no povu.

Operasaun ne’ebé envolve mós jornalista hosi Agência Tatoli no RTTL.EP ne’e, Segundu Komandante Kompañia Bravo UPF Covalima, Sarjentu Xefe Norberto Cardoso, introdús mós pontu markasaun fronteira no kuadru avizu entre Timor-Leste no Indonézia ne’ebé monta iha área zona livre.

“Dalan ilegál ne’e sai alvu ba ita atu kontrola no kombate, tanba ne’e ita sei liu mós iha zona livre sira hodi fó atensaun ba populasaun rai rua karik halo viajen labele hakat liu zona ne’e,” Sarjentu Xefe Norberto Cardoso haktuir.

Kuadru avizu ne’ebé monta iha área jurisdisaun Timor-Leste hakerek liafuan, “ATENSAUN, IMI TAMA ONA IHA TERITÓRIU TIMOR-LESTE NIAN”.

Durante periodu Estadu Emerjénsia primeiru to’o da-sanulu, forsa konjunta detein mós abitante balun no halo apreensaun ba sasán kontra bandu hanesan, gazolina, masin-midar, foos, ikan, bua no sasán bázika seluk tan.

Abitante sira ne’ebé forsa detein entrega ba ekipa Ministériu Saúde hodi kontrola sira nia saúde no submete ba konfinamentu obrigatóriu ka kuarentena Munisípiu Covalima.

“Área Aldeia Walalama, Wesei, Maubisi, Tuamauk, Anin Matan no Fatumean nu’udar dalan ne’ebé ita deteta ilegál sai ba to’o área Tua Natar ne’ebé baliza ho Alas-Indonézia ne’ebé ita baibain identifika ita-nia populasaun sira sosa gazolina, ikan-maran, sigarru, bua no sasán seluk ho povu Alas-Indonézia,” Sarjentu Xefe Norberto Cardoso tenik.

Deskansa iha baraka ida UPF nian iha fronteira Covalima. Imajen Tatoli/Eugénio Pereira

Oráriu tranzasaun negósiu ilegál ne’ebé baibain abitante nasaun-rua halo iha tempu kalan no loron. Ne’e maka sai sasidik (obstákulu/hambatan) no sasadik (dezafiu/tantangan) ba membru UPF atu kombate. Liuliu liga ho área  distánsia hosi postu ida ba postu entre kilómetru 10 to’o kilómetru 15  ho tempu operasaun la’o-ain lori oras lima (5) liu.

Durante akompaña operasaun  F-FDTL ho UPF nian iha liña fronteira Covalima nian, jornalista Agência Tatoli haree no nota katak forsa sira ne’ebé destaka iha fronteira menus fasilidade;  la iha radio komunikasaun, farda naklees, botas aat, maibé buat hirak ne’e la sai sasidik (obstákulu) ba sira tanba sira komunga ona katak RDTL mak importante liu.

Operasaun “kalsu” ho paun-maran

Atu operasaun iha terrenu la’o ho di’ak no forsa sira iha stamina própriu, maka ai-hahán ka nutrisaun tenke balansu. Maibé operasaun ida-ne’e tenke sakrifika an duni tanba durante operasaun la’o ain ho distánsia kilómetru 21, membru operasaun F-FDTL ho UPF  konsumu de’it hodi-sona, paun-maran no kafé no bee ne’ebé sira rasik prepara hodi “kalsu” sira-nia estómagu.

Forsa UPF ho F-FDTL deskansa iha baraka ida ne’ebé UPF sira harii iha liña fronteira Covalima nian. Imajen Tatoli/Eugénio Pereira

Liuhosi operasaun ne’e, forsa rua halo vizita mós postu vijilánsia UPF nian iha área Wesei ne’ebé harii uza de’it baraka simples sai mahon ba sira iha tempu kalan no loron bele deskansa hodi asegura atividade klandestinu iha fronteira terrestre area ne’ebá nian.

“Barraka, ami rasik maka harii dezde Estadu Emerjénsia dahuluk iha marsu 2020, ami koloka forsa pelotaun ida mai iha ne’e halo seguransa kada semana ida troka malu, tanba fatin ida ne’e risku tebes ba atividade ilegál entre ita-nia komunidade ho komunidade Indonézia,” Sarjentu Xefe Norberto Cardoso esklarese.

Molok termina patrullamentu, Komandante F-FDTL Postu Tilomar, Tenente Amaro no Segundu Komandante Kompañia Bravo UPF Covalima, Sarjentu Xefe Norberto Cardoso, deklara forsa-rua kontinua servisu hamutuk hodi prevene no kombate krime tráfiku droga, tráfiku umanu, terrorizmu liuhosi  patrullamentu no vijilánsia iha fronteira territorial.

TNI destaka nia forsa 400 iha fronteira RI-TL

Governadór NTB (Nusa Tengara Barat), H Zulkieflimansyah, akompaña hosi Komandante Korem (Danrem) 162/WB Brigadeiru TNI Rizal Ramdhani ho Kapolda NTB Irjen Pol M Iqbal, halo destakamentu forsa TNI na’in-400 atu asegura fronteira terrestre Indonézia no Timor-Leste. Imajen/ANTARA

Hosi sorin seluk, Estadu Repúblika Indonézia (RI)  koloka mós sira-nia forsa TNI (Tentara Nasional Indonesia) na’in-400 hosi batallaun Yonif 742 hodi mantein seguransa iha pontu entrada Indonézia ho Timor-Leste.

Haktuir hosi Agência Notisioza Indonézia, ANATARANEWS.com, edisaun sesta, 26 fevereiru 20201, TNI destaka nia membru 400 hosi Batallaun Infantaria 742/Satya Wira Yudha, atu bele halo operasaun intensivu iha liña fronteira RI-TL.

“Sira ne’ebé atu destaka iha fronteira RI-TL tenke forte iha fíziku no mentalidade besi-asu,” afirma Komandante Yunif 742/SWY, Majór Infantaria Bayu Sigit Dwi Untoro, iha ámbitu serimónia destakamentu forsa TNI hirak ne’ebé mai fronteira terrestre RI-TL ne’ebé relata hosi https://tni.mil.id.

Munisípiu Covalima ho total populasaun tuir estatístika 2015, iha na’in-65,301, kompostu hosi mane na’in-32,968 no feto na’in-32,333.

Jeografikamente, Munisípiu Covalima fronteira ka baliza parte Norte nian  ho Munisípiu Bobonaro no Kabupaten Belu, Nusa Tengara Timur (NTT)-Indonézia, hosi parte Sul nian baliza ho tasi Timor, parte Leste mós baliza ho Munisípiu Ainaro no parte Oeste baliza rabat ho Kabupaten Belu/NTT-Indonézia.

Jornalista   : Eugénio Pereira

Editór        : Francisco Simões

 

PUBLISIDADEiklan

HAKEREK NO HATÁN

Please enter your comment!
Please enter your name here