Membru Unidade Patrullamentu Fronteira (UPF) no FALINTIL-Forsa Defeza Timor-Leste (F-FDTL) blokeia estrada iha área Postu Administrativu Tilomar hodi evita abitante sira halo viajen hosi Suai ba Fatumea. Imajen Tatoli/Eugénio Pereira.

COVALIMA, 25 fevereiru 2021 (TATOLI) – Abitante hamutuk na’in-4.286 ne’ebé horik iha Postu Administrativu Fatumean daudaun ne’e komesa sente ona menus ai-han.

Abitante hirak-ne’e pertense ba Suku Nano, Belulik Leten, no Fatumea ho aldeia hitu (7)  komesa “preokupa” ona ho efeitu negativa hosi serka sanitaria ka lockdown.

Notísia Relevante : Serka sanitária, PDHJ rekomenda fó asisténsia umanitária ba povu

Administradór Postu Administrativu Fatumean, Filomeno Cardoso dehan, lockdown totál iha Fatumean hodi evita transmisaun peste letál COVID-19 hanesan pasu pozitivu, maibé afeta mós ba komunidade sira nia vida liuliu atu asesu ba ai-han.

Tuir observasaun Filomeno Cardoso katak estoke ai-han komunidade sira konsumu maioria foos, no foos ne’ebé kioske fa’an iha merkadu Fatumean menus no situasaun ne’e presiza hetan apoiu urjénsia hosi Governu liuhosi Sentru Lojístika Nasionál (CLN).

“Ohin dadeer ne’e ha’u rasik ba haree stoke ai-han la iha ona, tanba antes sira fa’an foos saka 200 agora foos la iha ona, ne’e hanesan ameasa boot ba ami nia komunidade iha Postu Fatumean,” Filomeno Cardoso, hateten  ba jornalista iha Fatumean, kinta ne’e.

Tuir nia haree, abitante sira ne’ebé hela iha Aldeia Klauhalek, Suku Belulik Leten presiza tebes apoiu ai-han, tanba área ne’e polísia no F-FDTL blokeia abitante sira atu sai hosi uma ba merkadu ka ba ba toos.

Nia dehan, iha prosesu lockdown ka serka sanitaria ne’e autoriza komunidade kuru bee-moos no hili ai hodi te’in, maibé ba movimentu  sai ba kompras ka vizita família no seluk tan labele.

Iha parte seluk, negosiante Loja Roman Bubersa Fatumean, Clara Madeira, informa antes ne’e sira-nia parte kompras foos ho stoke saka 200 hodi fa’an, maibé foos hotu ona, hafoin Governu deside serka sanitaria.

“Foos, ami ba sosa iha Dili saka 200, maibé agora foos besik hotu ona no ami  agora labele sai ba sosa iha Dili,” nia hateten.

Iha parte seluk, Xefe Suku Belulik Leten, Quintino José Amaral informa nia komunidade sofre COVID-19 no blokeia movimentu hodi la fó biban ba sira sosa ai-han ba sira-nia nesesidade báziku loron-loron nian.

“Ha’u nia povu na’in neen (6) pozitivu COVID-19, no ohin aumenta tan ida ba na’in hitu (7) ona. Nune’e, halo povu sira pániku no preokupa labele sai, no estoke ai-han hanesan foos iha kioske mós menus, tanba ne’e ami husu karik bele CLN atu halo intervensaun urjente,” nia hateten.

Tuir observasaun Agência Tatoli nota, uma komunidade iha Fatumean, hotu- hotu odamatan taka, no atividade merkadu no movimentu viajen ba-mai la iha, tanba parte PNTL no F-FDTL la admite.

MAE hapara atividade servisu administrasaun públiku  

Iha parte seluk, Administradór Postu Fatumean, Filomeno informa Ministériu Administrasaun Estatál (MAE),  kinta ne’e, hasai ona karta sirkulár ida hodi hapara provizóriu atividade servisu administrasaun públiku, hahú loron 25 fevereiru to’o loron 3 marsu 2021.

Nia hatutan, mezmu atividade paradu, maibé nu’udar lideransa sira sei halo esforsu hodi buka rezolve problema bázika ne’ebé povu enfrenta hodi luta hasoru COVID-19.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here