Prezidente Repúblika, Francisco Guterres "Lú-Olo". Imajen Tatoli/ Egas Cristovao

DILI, 25 fevereiru 2021 (TATOLI)—Prezidente Repúblika, Francisco Guterres Lú Olo, ohin, halo promosaun ba postu ofisiál jenerál no jenerais hafoin simu proposta hosi Governu no rona Konsellu Superiór Defeza no Seguransa.

Tuir komunikadu imprensa ne’ebé Agência TATOLI asesu haktuir, Xefe Estadu dekreta promosaun ba Koronel Calisto Santos Coli ‘Coliati’ ba postu Brigadeiru Jenerál, Kapitaun Mar e Guerra Donanciano do Rosário da Costa Gomes ‘Pedro Klamar Fuik’ ba Postu Komodoro, Brigadeiru-Jenerál Domingos Raul ‘Falur Rate Laek’ ba postu Maior-Jenerál no Maior-Jenerál Tito da Costa Cristovão ‘Lere Anan Timur’ ba Tenente-Jenerál.

Promosaun ba postu ofisiál Jenerál no Jenerais ne’e, bazea ba Estatutu Militár F-FDTL foun ne’ebé aporova liuhusi Dekretu-Lei númeru 33/2020, 2 setembru.

Tuir Estatutu Militár F-FDTL Foun, númeru 1 hosi artigu 261 hateten katak kargu Xefe Estadu-Maiór Forsa Armada okupa hosi militár ida ho postu Brigadeiru-Jenerál ou Komodoro.

Promosaun ba Donanciano Gomes atu viabiliza oportunidade ba ninia funsaun iha futuru hodi lidera misaun internasionál ba manuntensaun pás ne’ebé organiza hosi Nasaun Unida (ONU).

Númeru 1 husi artigu 260 Dekretu-Lei ne’e hateten katak Vise-Xefe Estadu-Maior-Jenerál Forsa Armada okupa hosi militár ida ho postu Major-Jenerál ou Kontra-Almirante.

Estatutu Militár F-FDTL Foun iha artigu 259 númeru fó-sai katak kargu Xefe Estadu-Maior-Jenerál Forsa Armada okupa hosi militár ida ho postu Tenente-Jenerál ou Vise-Almirante.

Dispozisaun Estatutu Militár F-FDTL Foun obriga Governu atu aprezenta ba Prezidente Repúblika atu halo promosaun ba postu ofisiál Jenerál no Jenerais hodi ezerse sira-nia funsaun.

Calisto Santos Coli ‘Coliati’ iha fevereiru 2011 promove sai koronel no hahú okupa kargu Xefe Estadu-Maior iha outubru 2018.

Donanciano Gomes ‘Pedro Klamar Fuik’ hetan promosaun ba Kapitaun Mar-e-Guerra iha 2010 no nomeadu ba Diretór Institutu Defeza Nasionál iha 2012.

Domingos Raul ‘Falur Rate Laek’ hetan promosaun ba Brigadeiru-Jenerál iha juñu 2018 no komesa okupa kargu Vise-Xefe Estadu-Maior-Jenerál iha outubru tinan hanesan.

Lere Anan Timur hetan promosaun ba Brigadeiru-Jenerál no okupa kargu Vise-Xefe Estadu-Maiór-Jenerál iha novembru 2009. Promove ba Maior-Jenerál no hahú ninia funsaun nu’udar Xefe Estadu-Maior Jenerál F-FDTL iha outubru 2011.

Prezidente Repúblika sei prezide serimonia promosaun ba Postu Ofisiál Jenerál no Jenerais, aban, 26 fevereiru 2021, tuku 09.00, iha Palásiu Prezidensiál Nicolau Lobato.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here