iklan

COVID-19, HEADLINE, SAÚDE

SAMES instala ona sala malirin atu rai vasina COVID-19

SAMES instala ona sala malirin atu rai vasina COVID-19

Kompañia Startec Enterprise hahú instala sala malirin atu rai ai-moruk vasinasaun COVID-19, iha edifísiu sentrál SAMES. Imajen Tatoli/Egas Cristovão.

DILI, 26 fevereiru 2021 (TATOLI)—Serbisu Autónomu Medikametu Ekipamentu Saúde (SAMES) halo ona instalasaun ba sala malirin hodi prepara atu rai ai-moruk vasinasaun COVID-19 ne’ebé sei to’o Timor-Leste (TL) iha fulan marsu.

“Polítika Governu-nian sei oferese uluk vasinasaun 20%. Entaun, ita prepara kondisaun hanesan sala malirin iha armazén sentrál Kampu Alor,’’ Diretór Ezekutivu SAMES, Santana Martins  hateten ba jornalista-sira iha armazén sentrál, sesta ne’e.

Notísia Relevante:OMS rekomenda tipu vasina AstraZeneca ba Timor-Leste

Nia dehan, sasan sira-ne’e sei rai kleur, nune’e tenki prepara fali sala malirin foun ba vasinasaun AstraZeneca no SAMES preparadu atu simu.

Kompañia Startec Enterprise mak halo instalasaun ba sala malirin ne’e tanba hetan konfiansa hosi Organizasaun Mundiál Fundu Emerjénsia Labarik-nian (UNICEF) tanba iha esperiénsia espesiál ba área instalasaun sala malirin no manutensaun.

“Maibé atu esplika loloos katak, aprovizionamentu ne’e suplay hosi kompañia ida iha Europa. Ho situasaun hanesan ne’e labele mai, entaun ita loke-fali  instalasaun ne’e ba  kompañia Timoroan no sira iha kapasidade atu instala. Hanoin katak, semana ida ka  rua  bele funsiona ona atu bele halo teste bainhira produtu ne’e to’o mai,” nia hateten.

Iha fatin hanesan Diretór kompañia Startec  Enterprises kim Tchia, hateten kompañia serbisu hamutuk ho SAMES tinan barak ona, tanba ne’e mak rekomenda ba UNICEF no kompañia  halo instalasaun.

“Ita komesa instala ona no semana ida ne’e nia laran ami bele remata no halo teste kompletu,’’ kim Tchia garante.

Materiál no ekipamentu ne’ebé uza hodi halo instalasaun ne’e mai hosi UNICEF ho orsamentu rihun $8-resin.

Instalasaun  ne’e sei kompletu ho kurum rua, ida ba temperatura normál no ida seluk ba temperatura malirin menus  grau-sélsiu 20.

Notísia Relevante:TL iha kondisaun simu AstraZeneca

Jornalista: Felicidade Ximenes

Editór: Cipriano Colo

iklan
iklan

Leave a Reply

iklan
error: Content is protected !!