Reprezentante OMS iha Timor-Leste, Arvind Mathur. Imajen Tatoli/Maria Auxiliadora.

DILI, 13 fevereiru 2021 (TATOLI)—Organizasaun Mundiál Saúde (OMS) konsidera Timor-Leste (TL) iha kondisaun atu simu ai-moruk ho tipu AstraZeneca ba Vasinasaun COVID-19.

Konsiderasaun ne’e OMS hato’o tanba haree no tetu bazeia-bá buat-tolu mak hanesan efikásia ba protesaun, seguransa no sistema iha rai-laran hodi prepara atu simu vasinasaun.

Notísia Relevante:OMS rekomenda tipu vasina AstraZeneca ba Timor-Leste

“TL iha kapsidade atu simu AstraZeneca  tanba agora iha ona zelera iha nível nasionál to’o suku atu rai ai-moruk ne’e. Ita mós iha oportuniadde di’ak atu bele halo vasina populasaun,’’ Representante OMS iha TL, Arvind Mathur hateten ba Jornalista Agência Tatoli iha serbisu fatin Caicoli, sesta (12/02).

Arvind Mathur esplika tipu AstraZeneca di’ak ba TL tanba bele rai iha zelera ho temperatura 2 to’o 8 grau-sélsiu.

Kona-bá vasinasaun Pfizer nia dehan tenki uza zelera ne’ebé ho temperatura 70 grau-sélsiu tanba sasan sira ne’e presiza asegura iha fatin ne’ebé malirin.

Tuir dadus OMS katak oras ne’e daudaun ema rihun 24-resin mak uza ona vasinasaun AstraZeneca ba faze datoluk iha Brasíl, Reinu Unidu no Áfrika.

Hosi ema ne’ebé tuir iha faze datoluk ne’e, iha de’it ema na’in-tolu mak relata iha efeitu adversu, no iha India ema tokon hitu mak vasina ona AstraZeneca maibé seidauk relata ninia efeitu adversu.

“Hanesan mós iha Bangaldesh, sira seidauk hetan aprovasaun hosi OMS ba lista utilizasaun ermerjénsia maibé sira aprova AstraZeneca hodi halo vasinasaun tanba nia efeitu adversu ne’e mínimu-liu,” nia subliña.

Parte OMS mós halo komparasaun ho vasinasaun tipu Pfizer katak iha ona ema na’in 83 mak relata kazu grave tanba iha efeitu aas tebes.

“Ami-nia papél fó rekomendasaun ba Governu bazeia ba faktus no evidénsia ne’ebé mak iha,” nia salienta.

OMS fó hanoin katak, Pfazer ho AstraZeneca laiha ida mak uza hodi halo vasinasaun ba ema ne’ebé idade menus hosi 18, tanba laiha dadus disponível ba vasinasaun ne’e.

Tanba ne’e, Vasinasaun AstraZeneca sei halo uluk ba ema ne’ebé iha risku aas hodi proteje sira-nia imunidade, tanba nasaun hotu-hotu monitoriza no halo avaliasaun ba vasina ne’e katak di’ak.

Efeitu hosi AstraZeneca

OMS  iha ona provas kona-ba efeitu hosi utilizasaun AstraZeneca mak hanesan isin katar, halo isin-baruk, ulun-moras, oin-halai  no lakon vontade atu han inklui isin-manas durante oras 24 to’o 48 maibé seguru no di’ak.

“Síntoma sira ne’e la-kleur tanba ne’e seguru ba ita-nia saúde. Entaun, ha’u nia mensajen ba populasaun TL atu suporta vasinasaun AstraZeneca,’’ nia apela.

OMS mós kategoriza ona kona-bá entidade sira ne’ebé sei simu uluk vasinasaun AstraZeneca mak hanesan profisionál saúde, PNTL, F-FDTL, Jornalista, idozu sira no ema ne’ebé sofre moras  komplikasaun.

Notísia Relevante:MS rejista kazu pozitivu COVID-19 na’in 14, baixa 38

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here