Provedora Direitu Umanu no Justisa (PDHJ), Jesuína Maria Ferreira Gomes. Imajen Tatoli/Dok.

DILI, 25 fevereiru 2021 (TATOLI)-Provedora Direitu Umanu no Justisa (PDHJ), Jesuína Maria Ferreira Gomes, rekomenda ba Governu atu fó asisténsia umanitária  hanesan hahán ka subsídiu ba komunidade sira ne’ebé pertense ba munisípiu  sira  ne’ebé  hetan serka sanitária  ka “lockdown”.

Governu deside halo serka sanitaria ba Munisípiu Bobonaro ho  Covalima tanba iha poténsia boot ba propagasaun surtu COVID-19 importadu hosi nasaun viziñu Indonéziu no momentu ne’e iha Covalima rasik, liuliu iha Postu Administrativu Fatumean iha ona transmisaun lokál.

Notísia Relevante : Reuniaun KM: deside bandu deslokasaun munisípiu seluk bá Bobonaro-Covalima

Provedora Jesuína Maria Ferreira Gomes, esplika iha dekretu Prezidente Repúblika (PR) suspende direitu sidadaun sira nia balun no atu implementa dekretu PR nian tenke liu hosi medida ezekusaun hosi Governu. Tanba ne’e fó kompeténsia tomak  ba Governu atu halo medida ezekusaun nesesária hodi halo prevensaun ba propagasaun peste letál COVID-19.

“Kuandu iha ameasa iha fatin ruma bele halo serka sanitaria no ha’u hanoin, Governu identifika ona saida mak sira presiza atu halo iha fatin hodi foti mekanizmu ruma oinsá responde nesesidade sidadaun sira nian,’’ Jesuína Maria Ferreira Gomes, hateten ba Agência Tatoli  iha nia servisu fatin, kinta ne’e.

PDHJ mós  halo monitoriza atu labele iha violasaun ba sidadaun sira-nia direitu báziku durante tempu serka sanitaria.  Tanba ne’e, Provedora  Jesuína Maria Ferreira Gomes, husu ba autoridade públika atu kontinua implementa Estadu emerjénsia hodi respeita ba sidadaun sira-nia direitu.

Notísia Relevante : Kazu pozitivu foun haat iha Covalima, posibilidade ‘transmisaun lokál’

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here