Primeiru-Ministru, Taur Matan Ruak prezide reuniaun Konsellu Ministru estraordinária, iha Palásiu Governu, segunda (15/02), Imajen TATOLI/Egas Cristovão

DILI, 15 fevereiru 2021 (TATOLI)—Reuniaun Konsellu Ministru estraórdinaria iha segunda ne’e, deside bandu deslokasaun ema husi munisípiu seluk ba munisípiu Bobonaro no Covalima.

Ministru Prezidénsia Konsellu Ministru, Fidelis Manuel Leite Magalhães, hateten desizaun ne’e ezekutivu sira hasai liuhosi aprovasaun Projetu Rezolusaun Governu ida.

“Desizaun ne’e impoin serka sanitária iha munisípiu rua ne’e, tanba kazu ativu COVID-19, dezignadamente kazu detetadu sira ne’ebé mai husi pasajen ilegál iha país, nune’e bele nafatin halo kuida saúde públika populasaun no impede okorrénsia transmisaun komunitária iha territóriu nasionál, Ministru Prezidénsia Konsellu Ministru,” Ministru Fidelis relata hafoin reuniaun ezekutivu, iha Palásiu Governu.

Portavós Governu ne’e dehan, Projetu Rezolusaun Governu ne’e sei prodús efeitu iha loron tuirmai ba ninia publikasaun no termina iha tuku 23:59 loron 03 marsu 2021.

“Hafoin publikasaun Rezolusaun Governu ne’e, sei hapara hotu movimentu ema tama-sai, ho movimentu transporte bá-mai husi munisípiu seluk bá munisípiu rua ne’e no husi munisípiu rua ne’e mai Dili mós, só bele ba hirak ne’ebé lori sasán umanitária, nesesidade urjente sira hanesan ai-han, inklui bandu movimentu ema bá-mai normál,” nia esplika.

Serka sanitária ne’e sei implementa bainhira iha Estadu Emerjénsia (EE), ne’ebé ninia loron kaduka depende ba EE no depende ba situasaun atuál iha munisípiu rua refere, kuandu moras COVID-19 aumenta liután Governu laiha opsaun seluk maka sei kontinua aplika opsaun ne’e.

“Husu ba populasaun iha munisípiu Bobonaro no Covalima atubele kuidadu malu, tau-matan ba malu, fó hanoin ba-malu atubele evita lisuk moras ida-ne’e, no kolabora ho autoridade sira nune’e labele lori moras COVID-19 tama barak liután, liuliu dalan ilegál ne’ebé ita labele kontrola,” governante ne’e fó hanoin.

Kona-ba prosesu aprendizajen sira, Ministériu Edukasaun, Juventude no Desportu (MEJD) sei hasai despaisu ida hodi hatán ba situasaun ne’e no koresponde ba medida ne’ebé prevee iha Rezolusaun Governu, maibé desizaun taka no loke eskola la mensiona iha rezolusaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here