Portavóz CIGC no Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

DILI, 23 fevereiru 2021 (TATOLI)—Sala Situação, Centro Integrado Gestão de Crises (SS-CIGC sígla portugés) anunsia kazu konfirmadu foun-haat, hosi aldeia Klauhalek, Suku Belulik Leten, Postu Administrativu Fatumean, Munisipiu Covalima.

Kazu foun ne’e fó sai hosi Koordenadór Forsa-Tarrefa Prevensaun no Mitigasaun Surtu COVID-19, Rui Maria de Araújo iha Centro Conveções Dili (CCD).

Notísia Relevante:Fatumean “lockdown”, kazu pozitivu foun haat

“Kazu konfirmadu foun haat, sira hotu hosi Aldeia Klauhalek, ne’ebé deteta hahú hosi amostra rastreiu ka screening ne’ebé foti iha dia 20 Fevereiru 2021,” Rui Araújo anunsia.

Nia esplika, ekipa vizilánsia epidemiolójika buka tuir-ninia kontaku sira to’o ohin lorokraik hamutuk ema na’in 29 kompostu hosi membru família na’in 13, viziñu-sira na’in 16.

“Na’in-tolu ne’ebé pozitivu tan, ida membru família, na’in-rua seluk viziñu,” nia dehan.

Kazu-sira iha leten, Médiku ne’e konsidera, hatudu transmisaun lokál hosi possivelmente kazu ‘importadu klandestinamente’ hosi populasaun ne’ebé tama-sai fronteira.

Ekipa vizilánsia epidemiolójika ho ekipa laboratóriu buka tuir nafatin kontaktu-sira hodi halo análize ba sira-nia amostra.

Hare hosi nível alerta no resposta ne’ebé Governu Timor-Leste adopta ba prevensaun no mitigasaun COVID-19 iha Timor-Leste, hahú ohin 23 fevereiru 2021, Timor-Leste tama fali faze ne’ebé hanaran Alerta 3 ka faze ‘mitigasaun’. Sérka Sanitária sei matein nafatin, tuir rezolusaun Governu númeru 4 no númeru 5, 15 fevereiru 2021.

Parte SS-CIGC mós informa katak, Kazu foun haat ne’e, oras-ne’e daudaun Serbisu Ambulánsia ba foti atu lori mai iha sala izolamentu Vera Cruz.

Iha oportunidade ne’e, SS-CIGC  hakarak partilla ho públiku rezultadu jerál rastreiu ka screening ne’ebé halo iha Munisípiu Covalima, Bobonaro ho RAEOA mak hanesan  Bobonaro totál amostra 1.022, 100% negativu. Covalima totál amostra 851 Pozitivu 4, negativu 847 amostra (99%). RAEOA totál amostra 252, 100% negativu.

Informa mós katak, rastreiu sei nafatin hala’o to’o dia 25 Fevereiru iha Covalima no Bobonaro, hodi bele kobre Postu Administrativu sira ne’ebé seidauk kobre, nune’e mós ho RAEOA ne’ebé sei hala’o to’o loron 27 Fevereiru.

Dadus loron 23 fevereiru Kazu konfirmadu foun 4, Kazu rekoperadu 0, Kazu ativu 25 no totál ema iha kuarentena 190.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here