Diretora Serbisu Saude Munisipiu Dili, Agostinha Segurado.Imajen/Antonio Goncalves

DILI,27 janeiru 2021 (TATOLI)—Serbisu Saúde Munisípiu Dili konsidera autoridade lokál sira munisípiu ne’e nian, iha papél importante atu kontribui hodi mobiliza komunidade ba prevensaun moras dengue.

Ho konsiderasaun ne’e maka, Diretora Serbisu Saúde Munisípiu Dili, Agostinha Segurado konvoka ona reuniaun ho autoridade postu administrativu haat iha Díli, xefi suku no xefi aldeia sira, halo mós avaliasaun serbisu atu alerta no halo mobilizasaun ba komunidade prevene moras ne’e.

Notísia Relevante:Janeiru, serbisu saúde munisípiu Dili rejista dengue 51

”Ami enkontru ona ho autoridade postu administrativu haat, xefi suku no xefi aldeia sira atu avalia serbisu no alerta ba komunidade hodi halo prevensaun ba dengue,” Agostinha Segurado hateten ba jornalista Agência Tatoli iha Sentru Saúde Formoza, kuarta (27/01).

Tarrefa serbisu ne’ebé fahe ona ba autoridade lokál sira mak hanesan, sei ajuda haree komunidade iha aldeia nia laran, mobiliza atu hamoos ambiente hela fatin, liuliu fó informasaun ba sira hodi labele so’e foer arbiru.

Iha tempu badak, Serbisu Saúde Munisípiu Dili mós hamutuk ho autoridade lokál sira sei halo sensibilizasaun ba komunidade iha Díli, kona-ba impaktu no transmisaun hosi dengue ne’e rasik, oinsá maneira prevensaun ne’ebé diak liu.

Alende ne’e, Serbisu Saúde Munisípiu Dili fahe ona sirkulár ida ba autoridade lokál sira atu halo kontrolu másimu, bainhira iha komunidade ne’ebé sofre dengue, xefi aldeia mak tenke buka uluk solusaun.

“Sira nia kna’ar mak kontrola no relata informasaun, bainhira komunidade hetan dengue, tenki hato’o ba parte Serbisu Saúde nian, nune’e ekipa vizilánsia tun kedan rega ambiente aldeia ne’e ho kímiku,” Agustinha sita pontu ida iha sirkulár ne’ebé fahe ona ba autoridade lokál sira.

Durante fulan janeiru, Serbisu Saúde Munisípiu Dili rejista kazu dengue  hamutuk 51 hosi Postu Administrativu Don Aleixo, Vera Cruz, Kristu Rei, Nain-Feto, la inklui Postu Administrativu Metinaro no Ataúro.

Notísia Relevante:Rejista pasiente rua, klínika Bairru-Pite apela prevene dengue

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here