Ilustrasaun

DILI, 20 fevereiru 2021 (TATOLI)—Diretora Jerál Prestasaun Saúde, Odete da Silva Viegas, hateten hosi janeiru-fevereiru 2021 ne’e Ministériu Saúde liuhosi Dirasaun Nasionál Kontrola Moras rejista kazu dengue hamutuk ema na’in-337 no ema na’in-ida mak mate.

Notísia Relevante: Janeiru, serbisu saúde munisípiu Dili rejista dengue 51

“Dirasaun Nasionál Kontrolu Moras iha Ministériu Saúde rejista kazu dengue iha tinan-2021 ne’e, iha janeiru hamutuk ema na’in-183 no hosi númeru ne’e ema ida mak mate, no iha fevereiru hamutuk ema na’in-154. Tanba pandemia mosu iha globalmente maibé iha ita-nia rain iha mós moras daudaun bolu ita hotu nia atensaun mak dengue. Hosi fulan janeiru to’o fevereiru 2021 ne’e, kazu dangue hamutuk 337. Entre kazu sira-ne’e, iha mate na’in ida, labarik feto tinan tolu no kazu ne’e hosi referál Munisípiu Manufahi mak lori mai iha Dili,” Odete da Silva Viegas hateten ba jornalista sira iha konferénsia imprensa ne’ebé hala’o iha Centro Convenção Dili (CCD), Merkadu Lama, Dili, sábadu ne’e.

Nia informa, kazu dengue ne’ebé aas liu mak iha Munisípiu Dili hamutuk ema na’in-204 (60.5%), Baucau hamutuk ema na’in-56 (16.6%), Bobonaro hamutuk ema na’in-23 (6.8%), no Munisípiu Ermera hamutuk ema na’in-13 (3.9%).

Tuir Munisípu Eremera, tuir nia, mak Munisípiu Manatuto hamutuk ema na’in-10 (3.0%), Manufahi hamutuk na’in-ualu (2.4%) ne’e mate na’in-ida , Covalima hamutuk na’in-ualu  (2.4%), Ainaro na’in-hitu  (2.1%), no Munisípiu Liquica no Lautem  hamutuk na’in-haat (1.2%).

Nia esplika, kazu dengue bazea ba klasifikasaun seksu ne’e mane na’in-167 (49.6%) no feto na’in-170 (50.4%). Kazu dengue haree ba klasifikasaun idade ne’ebé afeta liu mak labarik tinan lima (5) to’o 14 ne’e hamutuk na’in-127 (37.7%), hosi labarik tinan ida (1) to’o haat (4) ne’e hamutuk na’in-104 (30.9%), tinan 15 to’o 25 hamutuk na’in- 63 (18.7%), tinan 25 to’o 49 ne’e hamutuk na’in-23 (6.8%), labarik menus tinan ida (1) hamutuk na’in 14 (4.2%), tinan 50 ba leten hamutuk na’in-neen (1.8%).

“Tanba ne’e mak apelu ba komunidade sira hamoos ida-idak nia fatin, tanba agora daudaun tempu udan ita presiza atu hadi’a ijiene ambientál atu nune’e profisionál saúde sira halo sira-nia servisu maibé partisipasaun hosi familia ka komunidade nafatin hatene prevensaun ba moras dengue ne’e rasik. Tanba moras dengue ne’e, la’ós knaar saúde nian de’it maibé  oinsá kontribuisaun hosi komunidade ka família atu haree hamoos uma ninin sira-ne’e, maibé servisu profisionál saúde sira halo  nafatin fomigasaun no abate hodi rega susuk iha terenu,” nia apela.

Abate no fomigasaun sei sufisiente maibé nafatin husu kontribuisaun hosi parte hotu-hotu atu nune’e bele kontribui hodi bele hamoos fatin sira-ne’e para bele redús risku moras dengue ne’ebé bele halo ema mate.

Jornalista: Felicidade Ximenes

Editór: Cancio Ximenes

HAKEREK NO HATÁN

Please enter your comment!
Please enter your name here