Traballadór timor-oan sa’e Aviaun Qantas iha Aeroportu Comoro hodi aranka ba Austrália, kuarta (24/02). Imajen TATOLI/António Gonçalves

DILI, 24 fevereiru 2021 (TATOLI)-Traballadór timor-oan hamutuk na’in-19 aranka bá Austrália iha kuarta (24/02), tuku 14:30 lorokraik ho aviaun Qantas.

Tuir lista hosi Sekretaria Estadu Formasaun Profesionál no Empregu (SEFOPE), loloos traballadór hamutuk na’in-20 mak sei aranka, ne’ebé kompostu hosi feto na’in-2, mane na’in-18, maibé traballadór feto na’in-ida kansela tanba grávida.

“Ita haruka timor-oan na’in-20 bá tan Austrália, maibé ida falla tanba teste medikál deteta katak grávida. Entaun na’in-19 mak sei arranka bá,” Adidu Traballu SEFOPE ba Austrália, Tomas de Araújo informa ba Agência TATOLI iha Aeroportu Internasionál Prezidente Nicolau Lobato, Comoro, Dili, kuarta ne’e.

Notísia relevante: SEFOPE despede tan traballadór 20 bá Austrália

Hafoin ratifikasaun akordu, aban aviaun Qantas voo dahuluk mai Timor-Leste

Tuir Adidu, teste medikál halo dala-ida de’it no kuandu traballadór aranka ona no fila mai mak ninia kartaun identidade sei válidu hela, maka sei konsidera maibé kuandu atu arranka fali tenke teste filafali tanba hela tempu barak iha Timór, tanba ne’e kritéria ne’e hosi empregadór rasik.

“To’o iha Darwin sira sei tama kuarentena durante loron 14 no kuandu ramata maka empregadór hasoru traballadór sira hodi lori ba sira-nia fatin,” Adidu Traballu esplika.

Traballadór timor-oan prepara halo check in iha Aeroportu Comoro, molok sa’e ba aviaun, kuarta (24/02). Imajen TATOLI/António Gonçalves

Iha parte seluk, traballadór timor-oan, Evangelinho Viegas Tilman, agradese tebes ba konfiansa empregadór ne’ebé fó fiar nafatin ba sira hodi husu hikas serbisu iha Austrália.

“Ha’u hetan oportunidade iha tinan 2015 hodi serbisu iha Austrália no agora kompañia husu ami bá filafali tanba de’it konsidera ami-nia serbisu di’ak, prestasaun di’ak, no pontualidade. Ami serbisu iha área agrikultura no kualker serbisu ne’ebé patraun fó mai ami halo, ezemplu utiliza tratór lere du’ut, kuu ai-fuan, halo irrigasaun, no serbisu agrikultura seluk tan ne’ebé mak ami halo,” traballadór timor-oan ne’e dehan.

Nia konsidera, bainhira bá serbisu iha Austrália la’ós responsabilidade pesoál de’it maibé mós lori nasaun nia naran, tanba ne’e tenke hatudu komportamentu di’ak nafatin nune’e bele manan konfiansa empregadór nafatin.

“Atu nune’e oportunidade ne’e nafatin iha ba timor-oan sira ne’ebé  daudaun ne’e kompete iha programa SEFOPE hodi bele ba nafatin. Ha’u ba hamutuk dala-neen ona, klaru katak bá serbisu ne’e buka osan, balun uza no balun tenke fó ba família hodi sustenta ekonomia família hanesan selu oan no alin sira-nia eskola,” Evangelinho akresenta.

Traballadór timor-oan sa’e Aviaun Qantas iha Aeroportu Comoro hodi aranka ba Austrália, kuarta (24/02). Imajen TATOLI/António Gonçalves

Iha biban ne’e, nia husu ba timor-oan sira ne’ebé mak sei bá serbisu iha Austrália atu prepara-an fíziku, saúde no aprende lian inglés oituan, nune’e empreza presiza karik bele preparadu.

Jornalista: Antónia Gusmão

Editora: Julia Chatarina

2 KOMENTÁRIU

  1. As’wain SEFOPE Ho Nia Funsionario Public Mak Hau Respeito no Hadomi,Fabor imi nian Liu Osan mean,imi Nia Domin Ba Timor oan sira atu Serbisu iha Rai Liu,imi Nia Fuan hanesan :Murak mean hakerek iha Ami Fuan,Fabor imi nian Ami selu labele,Fabor imi nian Maromak Mak Sei Selu.
    Boom Gestor,Boom Unico,Boom Unidos,Bom Sucseso.SEFOPE iha Fuan Laran,Fuan Domin tomak.

HAKEREK NO HATÁN

Please enter your comment!
Please enter your name here