Seremónia despedida traballadór timor-oan 20 bá serbisu iha Austrália, iha sala SEFOPE, Caicoli, tersa (23/02). Imajen/Mídia SEFOPE

DILI, 23 fevereiu 2021 (TATOLI)Sekretáriu Estadu Formasaun Profesionál no Empregu (SEFOPE), Alarico do Rosário, halo despedida traballadór timor-oan na’in-20 molok desloka bá Austrália hodi serbisu.

Traballadór hirak ne’e kompostu hosi mane na’in-18 no feto na’in-rua, ne’ebé sei ba serbisu iha kompañia ADCO hamutuk na’in-13 no kompaña Connect group na’in-hitu.

Iha biban ne’e, Sekretáriu Estadu Alarico do Rosário, hateten traballadór hirak ne’e la’ós traballadór foun maibé uluk hirak ne’e konsege serbisu ona iha Austrália no hatudu prestasaun serbisu di’ak, maka agora kompañia bolu fali ba kontinua serbisu iha área agrikultura, ne’ebé sei aranka iha loron kuarta (24/02).

“Husu atu kontinua hatudu prestasaun serbisu ne’ebé di’ak, nune’e empregadór sira iha Austrália bele fó serbisu barak liután ba joven timor-oan sira,” governante ne’e apela ba traballadór sira iha ámbitu seremónia despedida,  iha sala SEFOPE, Caicoli, tersa ne’e.

Biban ne’e, nia husu mós ba traballadór sira bainhira bá serbisu tenke rai osan, nune’e fila mai bele hadi’a ekonomia família no mós nasaun Timor-Leste.

Tuir dadus SEFOPE, hosi tinan 2014 to’o 2018, timor-oan hamutuk 2.819 maka serbisu ona iha Austrália liuhosi Seasonal Worker Peogramme (SWP) iha área ospitalidade no ortikultura no konsege rekolla retornu milliaun $9.698.579,15 mai Timor-Leste.

Iha tinan 2012 traballadór hamutuk 12, tinan 2013 traballadór na’in-36, 2014 ema na’in-131, 2015 na’in-181, 2016 iha traballadór na’in-298, tinan 2017 na’in-782, 2018 ema na’in-1.380 no 2019 ema lima.

Iha área ortikultura traballadór mane hamutuk na’in-1.823 no feto 744, enkuantu iha ospitalidade mane 187 no feto 95, ne’ebé husi númeru ne’e traballadór balun serbisu repetidu to’o dala-haat hafoin kompleta serbisu ho durasaun fulan-neen, bazeia ba prestasaun serbisu traballadór iha kompañia sira.

Iha loron 02 dezembru 2020, traballadór timor-oan na’in-152 hosi SWP aranka ba Tasmánia, Austrália.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here