Aviaun Qantas. Imajen/The Guardian

DILI, 23 fevereiru 2020 (TATOLI)—Aviaun Qantas sei hala’o voo dahuluk tula pasajeiru hosi Darwin, Austrália mai Timor-Leste iha loron kuarta (24/02), hafoin Parlamentu nasaun rua ratifika ona akordu aéreu atu fasilita konetividade no loke dalan ba kompañia aérea bele sirkula.

“Operasaun voo dahuluk aviaun Qantas sei tula pasajeiru no sasán hosi Austrália mai Timor-Leste iha loron 24 fevereiru,” refere nota imprensa ne’ebé Agência TATOLI asesu iha portál ofisiál Qantas, tersa ne’e.

Pasajeiru no sasán ne’ebé sei tula mai sei tuir nafatin protokulu prevensaun no kombate COVID-19, liuliu kumpre kuarentena no teste Polymerase Chain Reaction (PCR).

Ratifikasaun akordu servisu aéreu ne’e sei loke dalan ba aviaun australiana bele sirkula komersiálmente iha Timor-Leste hodi asegura konetividade aéreu entre nasaun rua ne’e.

Nune’e, proposta rezolusaun ne’e bazeia ba nasaun rua nia hakarak atu promove sistema aviasaun internasionál ne’ebé iha konkorrénsia entre empreza transporte aéreu sira iha merkadu, ho servisu sira ne’ebé kompetitivu, inovadór no seguru.

Ho ratifikasaun Akordu ne’e, kompañia aérea sira sei bele tama iha espasu aéreu nasaun rua nia, ne’ebé la presiza autorizasaun prévia maibé kumpre de’it rekizitu regulamentár inklui seguransa hodi permite hasa’e konkorrénsia no hamenus folin billete no transporte merkadoria.

Antes ne’e, Ministru Transporte no Komunikasaun, José Agostinho da Silva, hateten intensaun halo ratifikasaun ba akordu aéreu entre Timor-Leste no Austrália ne’e fasilta hametin konetividade entre nasaun rua ne’e.

Austrália iha baze legál ida atu designa aviaun ruma hanesan Qantas no Virgin mai iha Timor-Leste atubele asegura konetividade aéreu.

Daudaun, Airnorth mak asegura konetividade entre Timor-Leste no Austrália maibé to’o de’it iha Darwin, ho tipu viajen charter ne’ebé iha nesesidade mak semo.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here