Ekipa Vizilansia Ministériu Saúde rejista hela naran abitante sira halo screening COVID-19 iha Aldeia Lelan, Postu Postu Administrativu Mauqatar- Covalima. Imajen Tatoli/Eugénio Pereira

COVALIMA, 23 fevereiru  2021 (TATOLI)- Ekipa Forsa Konjunta Komandu Polísia Nasionál Timor-Leste (PNTL) no Komandu FALINTIL-Forsa Defeza Timor-Leste (F-FDTL), tersa ne’e, hola medida rigorozu hodi blokeia  ona movimentu abitante sira iha Suku Fatumean, Postu Administrativu Fatumean, Munisípiu Covalima.

Forsa konjunta halo operasaun  hodi bandu komunidade sira dezloka hosi suku ida ba suku seluk tanba deteta kazu konfirmadu pozitivu COVID-19  foun haat  iha Fatumean laran.

Abitante sira hosi Suku Fatumean kompostu uma -kain ida ne’e deskonfia sofre COVID-19, hafoin iha loron sábadu (20/02), ekipa vijilánsia Ministériu Saúde foti screening COVID-19 hodi lori ba teste iha Laboratóriu Nasionál Dili identifika abitante iha sintoma COVID-19.

Notísia Relevante : Governu agradese partisipasaun povu iha teste swab COVID-19

Tuir observasaun Agência Tatoli nian iha Covalima nota katak, ekipa  Ministériu Saúde ho ekipa forsa tarefa ne’ebé halo hela atividade iha Munisípiu Covalima iha segunda kalan (22/02), dezloka kedas ba Suku Fatumean hodi lori ekipamentu médiku kompletu hodi ba halo teste ba abitante ne’e.

Ekipa Vijilánsia Ministériu Saúde halo servisu iha Postu Administrativu Fatululik, Covalima. Imajen Tatoli/Eugénio Pereira

Ekipa rasik koordena ona ho autoridade suku no parte família lori ona abitante ne’e mai Covalima-Vila hodi hala’o screening swab COVID-19  no tuir planu ekipa sei ba foti mós família sira hodi submete ba konfinamentu obrigatóriu ka kuarentena.

Daudaun ne’e, forsa konjunta koordena ho autoridade suku koloka forsa asegura ona seguransa kontrola movimentu abitante hosi Covalima, Fohorem labele halo movimentu ba mai iha Fatumean hodi evita transmisaun lokál  COVID-19.

 Ekipa vijilánsia termina rekolla amostra

Ekipa Vijilánsia Ministériu Saúde, tersa ne’e, termina ona screening swab COVID-19 iha liña fronteira Munisípiu Covalima ho amostra hamutuk 1.373.

Amostra hamutuk 1.373 ne’e ekipa rekolla hahú hosi loron 16 to’o 23 fevereiru, no amostra hamutuk 1.178 maka transporta ona ba Laboratóriu Nasionál Dili hodi halo konfirmasaun no sei iha amostra hamutuk 285 maka sei konserva iha Covalima hodi hein ekipa transporta ba Dili.

“Durante loron ualu, ami konsege rekolla amostra hamutuk 1.178 no amostra hamutuk 285 ne’ebé ohin rekolla iha Postu Administrativu Fatululik nian konserva iha Covalima hodi hein transporta ba Dili,” Medikál Sientista, António Sales, informa ba jornalista iha Munisípiu Covalima.

Rezultadu hosi amostra sira ne’ebé lori ona ba teste ninia rezultadu ekipa Sentru Integradu Jestaun Krize (CIGC) maka sei fó sai iha tempu besik.

Ekipa vijilánsia sei kontinua mantein iha Munisípiu Covalima hodi hein orientasaun CIGC hodi haree halo identifikasaun kle’an ba abitante balun ne’ebé ekipa identifika iha sintoma ba COVID-19 iha Postu Administrativu Fatumean, Covalima.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here