Ekipa vijilánsia Ministériu Saúde ne'ebé servisu hasai amostra teste swab COVID-19 iha Postu Administrativu Fatumea, Munisípiu Covalima. Imajen/Eugénio Pereira

COVALIMA, 20 fevereiru 2021 (TATOLI) – Ekipa vijilánsia Ministériu Saúde evakua urjénsia amostra teste swab COVID-19 ba abitante na’in-145 hosi Postu Administrativu Fatumea ba Munisípiu Covalima tanba problema liña eletrisidade mate.

Amostra teste swab ne’e ekipa saúde foti hosi komunidade sita iha Suku Nanu, ho aldeia rua; Tradukama ho Aldeia Makokon, Postu Administrativu Fatumea nian ne’ebé ekipa lori ba rai ona iha jeleira Sentru Saúde Postu Administrativu Fatumea nian.

Notísia Relevante : MS hahú foti amostra sidadaun 400-resin iha Bobonaro no Covalima

Hafoin rai ekipamentu hira ne’e, derrepente eletrisidade mate  kuaze oras lima hahú hosi tuku 17:15 to’o tuku 21:00 Otl,  nune’e tenke obriga ekipa iha tuku  19:00 Otl, evakua amostra swab COVID-19 ne’e hosi  Fatumea ba Covalima-Vila.

Reprezentante ekipa vijilánsia Ministériu Saúde Nasionál nu’udar mós Médiku Sientífiku, António Sales, informa teste swab COVID-19 hosi abitante 145 tenke halo salvasaun lalais, tanba eletrisidade ne’ebé mate afeta ba amostra hirak ne’e labele dura, tanba la  iha jelu (es batu).

Nia esplika, tuir regra amostra ne’e tenke rai iha jeleira laran hodi kontrola ninia temperatura malirin hodi labele hetan estragus.

“Depos ita koleta amostra hirak ne’e tuir loloos tenke rai iha jeleira laran para malirin nafatin, maibé tanba eletrisidade mate besik oras-rua maka kontinua to’o aban ahi mate beibeik bele afeta ba amostra ne’e nia kualidade,”  António Sales informa ba jornalista iha Sentru Saúde Fatumea, sábadu ne’e.

Tuir observasaun Agência TATOLI iha terrenu nota katak  mezmu eletrisidade mate, maibé ekipa sira kontinua halo nafatin servisu hodi salva amostra hirak ne’e labele hetan estragus.

Iha fatin hanesan, Xefe Sentru Saúde Komunitáriu Fatumea, Agostinho Amaral dehan, Fatumea sempre hasoru problema bainhira udan no anin eletrisidade mate beibeik.

Agostinho konsidera problema ahi-mate bele estraga amostra hirak ne’e no servisu ekipa nian iha terrenu.

Distánsia Postu Administrativu Fatumea  ba kapitál Munisipiu Covalima kilómetru 45 no tempu rai udan bee-sobu estraga no ponte ki’ik balun insípidu hodi halo tahu maka’as.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here