Xefe Sentru Saúde Komunitáriu Fatumea, Agostinho Amaral. Imajen Tatoli/Eugénio Pereira

COVALIMA,  20 fevereiru 2021 (TATOLI)- Xefe Sentru Saúde Fatumea, Munisípiu Covalima, Agostinho Amaral, informa durante janeiru 2020 to’o fevereiru 2021, moras infesaun respiratória aguda (IRA) ho diarea maka rejista aas iha sentru saúde refere.

“Moras ne’ebé rejistu ho númeru ki’ik iha Sentru Saúde Fatumea maka  isin-katar. Númeru moras boot maka moras infesaun respiratória aguda ho diarea,” Agostinho Amaral, informa ba Agência TATOLI iha Sentru Saúde Fatumea, Covalima, sábadu ne’e.

Tuir observasaun médiku sira nian  nota katak  abitante sira sofre moras ne’e aas, kauza hosi kondisaun ambiente ne’ebé la saudavel hanesan rai-rahun maka’as, no komunidade hela iha área foho leten dala barak enfrenta problema bee-moos ho kondisaun estrada ne’ebé aat difikulta tebes povu hala’o viajen ba tratamentu saúde.

Notísia Relevante : Bebé 91 moris iha Sentru Saúde Fatumea ho kondisaun di’ak

Maski Agostinho Amaral informa detallu totál númeru pasiente sira ne’ebé moras IRA ho diarea, maibé tuir dadus estatístika sentru saúde ne’e kada loron sempre rejista pasiente ne’ebé sofre moras maioria domina hosi ema-boot no loron ida bele rejistu to’o ema na’in-20-liu.

Durante ne’e ekipa saúde sira liuhosi programa SISKA, Saúde ba Familia sempre halo ajenda kada semana vizita demisionáriu ba populasaun sira hela iha área rurál hodi fó konsulta ba idózus no labarik sira no inan isin-rua.

Kona-ba ferik no katuas,  no ema ho defisiénsia sira ne’ebé sofre moras grave sempre halo rekomendasaun ba Ospitál Covalima hodi haruka ambulánsia ba evakua lori ba hala’o tratamentu iha Covalima.

Kona-ba fasilidade servisu no ai-moruk, Xefe Sentru Saúde Agostinho relata, durante ne’e ai-moruk sufisiente hodi fó asisténsia ba komunidade sira, tanba bainhira ai-moruk menus ekipa SAMES Covalima sempre fó resposta kedas.

Sentru Saúde ne’e iha rekursu pesoál saúde hamutuk na’in-19 kompostu parteira na’in-rua, ida agora hala’o hela estudu iha Universidade Nasional Timor Lorosa’e (UNTL), enfermeiru na’in-neen, médiku na’in-rua, analista na’in-ida, farmásia ida, no parte lejístika.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here