Prezidente Komisan A PB, Deputadu bankada Fretilin, Joaquim dos Santos. Imajen/Egas Cristovão

DILI, 20 fevereiru 2020 (TATOLI)—Parlamentu Nasionál husu Governu kumpre rezolusaun númeru 21/2019, 3 outubru, nune’e hola medida adekuada hodi halo protesaun ba ema ho defisiénsia sira, tanba to’o agora uma fukun seidauk simu relatóriu kona-ba implementasaun rezolusaun ne’e.

Notísia Relevante: MSSI haree injustisa no lakohi tau Ema ho Defisiénsia iha kotuk

Rezolusaun ne’e relembra kompromisu nasaun nian hodi atinje Objetivu Dezenvolvimentu Sustentável (ODS), ne’ebé afirma ona liuhosi Rezolusaun Parlamentu Nasionál númeru 19/2015, 18 de novembru liubá.

Prezidente Komisaun A ne’ebé trata asuntu justisa no konstitusionál, Deputadu Joaquim dos Santos ‘Boraluli’, hateten selebrasaun loron mundiál justisa sosiál ne’e labele halo festa de’it maibé selebra festa loron mundiál justisa sosiál ne’e, atu atu kria kondisaun ba ema ho defisiénsia.

Atu nune’e, nia dehan, ema ho defiénsia bele hetan buat ruma ba sira-nia moris, la’ós atu fahe osan maibé pelumenus instituisaun Estadu tenke iha grantia ida ba ema sira-ne’e hetan moris ida para hetan asesu sira-nia direitu nu’udar sidadaun.

“Rezolusaun internasionál ne’ebé ita simu nu’udar regulamentu interna kona-ba defisiénsia ne’e Governu tenke kumpre relasiona ho direitu sosiál ne’e hodi kria kondisaun tanba kuandu ita ratifika ona sai ona regra interna,” Deputadu Joaquim dos Santos informa ba Agência TATOLI, relasiona ho komemorasaun Loron Mundiál ba Justisa Sosiál ne’ebé mundu selebra iha kada loron 20 fevereiru, iha resintu Patlamentu Nasionál, Dili, sesta ne’e.

Maibé, nia dehan, iha rezolusaun 21/2019 ne’e iha númeru 1 Parlamentu Nasional rekomenda ba Governu atu hamosu prosedimentu legál hodi halo ratifikasaun ba Konvensaun Direitu ba Ema ho Defisiénsia sira.

“To’o agora Governu la halo ida-ne’e. Ha’u seidauk rona buat ruma to’o agora. Governu halo saida de’it maibé la informa mai ami. Rezolusaun 21/2019 parlamentu rekomenda ona, agora Governu nia obrigasaun nunka informa mai parlamentu, ita nunka informadu. Ema sira-ne’ebé ho defisiénsia ne’e mai hakilar beibeik ka mai aprezenta keixa beibeik,” nia akresenta.

Prezidente Komisaun A ne’e hatutan, Parlamentu Nasionál rekomenda ona ba Governu, se seidauk iha regulamentu ruma para atu deskreve konvensaun ne’e hodi fó kbiit ba ema sira-ne’e atu bele hetan justisa.

“Orsamentu kada tinan ne’ebé ita aprova tenke prevee verba ida ba ida-ne’e. Ita la hatene iha ka lae, ita la hatene. Tanba tenke relata mai iha parlamentu ka komisaun sira-ne’ebé toma konta asuntu ne’e ba halo fiskalizasaun hodi deteta ezekusaun ne’e iha efeitu efisiénsia no efikásia ka lae,” nia dehan.

Deputadu Bankada FRETILIN ne’e hanoin katak, lokalizasaun ne’e tenke reál, labele husik defisiénsia sira mesak mak organiza-aan, ne’e ladi’ak ida tanba sira mós iha família entaun organiza sira tenke mós konsidera família sira-nia opiniaun.

“Sira bele iha organizasaun maibé sira labele sees hosi família. Governu nia polítika tenke tau atensaun ba ida-ne’e. Dezenvolvimentu asesível ne’e mak polítika Governu nian iha orsamentu ho dezenvolvimentu infraestrutura katak kria kondisaun ba sira, nune’e sira rasik bele iha meiu hodi dezenvolve sira-nia moris ho apoiu polítika Governu ninian,” nia fó hanoin ba Governu.

Prezidente Komisaun A fundamenta, kona-ba Parlamentu Nasionál nia rekomendasaun ba Governu atu adere lalais ba Konvensaun Diretu ba Ema ho Defisiénsia sira tenke inisitiva mai hosi Governu.

“Se ida-ne’e seidauk halo entaun Governu kumpre de’it rezolusaun 21/2019 ne’e, ita hein orsamentu 2022 mai, Governu tenke iha polítika hodi tau atensaun ba ema ho defisiénsia,” Prezidente Komisaun A ne’e hateten.

Prezidente Komisaun A fó-sai katak, iha rezolusaun 21/2019 ne’e parlamentu rekomenda pontu hamutuk 13 atu Governu kumpre maibé iha implementasaun to’o parlamentu la simu relatóriu ezekusaun.

Entretantu, Sekretária Komisaun F (saúde, seguransa sosiál no igualdade jéneru), Deputada Helena Martins Belo, husu ema hotu respeita ema ho defiénsia iha fatin públika no Governu mós define polítika ida di’ak iha orsamentu.

“Aproveita opurtunidade ne’e hakarak informa ba ema ho defisiénsia sira katak, parlamentu esforsu ona hodi rekomenda liuhosi rezolusaun ida atu fó protesaun ba maluk sira. Ami-nia fiskalizasaun deteta katak Governu ladún fó importánsia ba ema ho defisiénsia sira. Ami husu OJE 2022 tenke iha polítika ba ida-ne’e tanba sira mós nu’udar sidadaun,” nia propoin.

Komisaun F mós seidauk iha dadus kona-ba ema ho defisiénsia ligada ba dezenvolvimentu hodi bele garante asesibilidade tanba durante ne’e Governu la aprezenta relatóriu ezekusaun.

Deputadu Helena nia hanoin kona-ba lokalizasaun ba ema ho defisiénsia ne’e, ema hotu hatene maibé Governu tenke aprezenta polítika di’akliu tanba durante aprezentasaun orsamentu la fó importánsia.

Nia fundamenta, kona-ba rekomendasaun parlamentu rekomenda ona liuhosi rezolusaun ne’e maibé Governu mak la kumpre.

“Ba tinan oin, ami sei foka asuntu ne’e ho kle’an, nune’e Governu hola atensaun ba maluk sira defisiénsia ne’e,” nia dehan.

Notísia Relevante: Komisaun A husu Governu kumpre rezolusaun ba ema ho defisiénsia

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here