Ema ho defisiénsia sira uainhira partisipa iha workshop kona-ba sensibilizasaun Planu Nasionál ba Ema ho Defisiénsia ba Setór Edukasaun 2020-2024, iha Salaun Infordepe, Balide Dili, 1 Otubro 2020. Imajen TATOLI/António Gonçalves.

DILI, 20 fevereiru 2021 (TATOLI)—Diretór Nasionál Promosaun Direitu ba Ema ho Defisiénsia, Mateus da Silva, hateten ho situasaun ida-ne’e mak Governu liuhosi Ministériu Solidariedade Sosiál no Inkluzaun (MSSI) liuhosi DNPDPD esforsu atu haree injustisa ne’ebé akontese ba Ema ho Defisiénsia sira hodi haree ba ema hotu-hotu ho justu no lakohi tau ema ida iha kotuk.

Notísia Relevante: Governu fó ”Bolsa da Mãe” ba Ema ho Defisiénsia hamutuk 582

“Tanba mosu insjustisa ne’e mak MSSI iha polítika hodi fó subsídiu ba ema invalidéz sira inklui bolsa da mãe ba labarik defisiénsia sira, nune’e bele trata sira-nia nesesidade eskola no moris loro-loron nian,” Mateus da Silva hateten ba Agência TATOLI relasiona ho komemorasaun Loron Mundiál ba Justisa Sosiál ne’ebé mundu selebra iha kada loron 20 fevereiru, iha nia knaar fatin MSSI, Caicoli, Dili, sesta ne’e.

Mateus reforsa tan, liuhosi asuntu ne’e mak, MSSI hamutuk lina ministeriál hotu hodi implementa Planu Asaun Nasionál ba Ema ho Defisiénsia (EhD) tuir Konstituisaun artigu 16, 21, no 56, ne’ebé mak sadere hodi fó asisténsia sosiál no hakbiit nafatin Ema ho Defisiénsia.

Iha Konstituisaun RDTL Artigu 16 (Universalidade no igualdade) haktuir (1) Sidadaun hotu-hotu hanesan iha lei nia oin, no mós iha direitu no obrigasaun hanesan; (2) Labele halo diskriminasaun ba ema ida tanba nia kulit, nia rasa, nia estadu sivíl, nia seksu, orijen étniku, nia lian, pozisaun sosiál eh ekonómiku, hanoin polítiku ka ideolojia, relijiaun, instrusaun eh nia kondisaun fízika eh mentál.

Artigu 21 (Sidadaun ne’ebé iha defisiénsia) hateten (1) Sidadaun ne’ebé iha defisiénsia fíziku eh mentál iha direitu no mós obrigasaun hanesan sidadaun sira seluk, maibé sira sei la hala’o knaar hirak ne’ebé sira labele hala’o tanba de’it sira-nia defisiénsia; (2) Estadu, bainhira bele, promove protesaun ba sidadaun sira-ne’ebé iha defisiénsia, tuir lei haruka.

Artigu 56 (Seguransa no tulun sosiál nian) haktuir (1) Sidadaun hotu-hotu iha direitu ba seguransa no asisténsia sosiál, tuir lei haruka; (2) Estadu hola medida sira tuir nia kbiit nasionál nian, hodi halo organizasaun ho nia sistema ida ba seguransa sosiál; (3) Estadu apoia no fiskaliza, tuir lei, ba serbisu no funsaun instituisaun solidariedade sosiál nian, no seluk tan ne’ebé nu’udar interese públiku la buka lukru ka funan.

Aleinde ida-ne’e, nia hateten Kona-ba asesibilidade ba infraestrutura nian, MSSI hala’o ona servisu hamutuk ho Ministériu Obras Públika (MOP) hodi kria ona Planu Asaun Nasionál ida hodi asegura tanba dala barak Ema ho Defisiénsia sira lahetan asesibilidade ba infraestrutura.

“MOP halo ona dezeñu konstrusaun ne’ebé sei adota universál hodi enkaixa ona iha planu no Orsamentu Jerál Estadu (OJE) ba tinan fiskál nian, inklui Ministériu Edukasaun Juventude no Desportu (MEJD) ne’ebé tau edukasaun inkluzivu ba EhD no ministériu sira mós ida-idak iha ona planu atu implementa,” nia informa.

Maske nune’e, diretór ne’e hateten, to’o oras ne’e komunidade ho servidór públiku sira balun seidauk iha konsiderasaun ba Ema ho Defisiénsia (EhD) sira iha Timor-Leste hodi tau ema hirak ne’e iha kotuk.

“Ami-nia papél mak atu serví ba Ema ho Defisiénsia ne’ebé mak durante ne’e la konsidera, hetan diskriminasaun no estigmasaun hosi ita-nia komunidade rasik inklui autór hanesan ami sira servidór públiku ne’ebé la fó opurtunidade ba Ema ho Defisiénsia atu dezenvolve sira-nia kbiit rasik,” nia hateten.

Jornalista : Osória Marques

Editór : Cancio Ximenes

HAKEREK NO HATÁN

Please enter your comment!
Please enter your name here