Deputado FRETILIN, Joaquim dos Santos. Imajen Tatoli/Egas Cristóvão

DILI, 08 setembru 2020 (TATOLI)—Komisaun A (Justisa no Konstitusionál) iha Parlamentu Nasionál husu Governu liuhosi Ministériu Solidariedade Sosiál no Inkluzaun atu kumpre rezolusaun 21/2019 kona-ba protesaun ba ema ho defisiénsia sira iha Timor-Leste.

Parlamentu Nasionál aprova projetu-rezolusaun ne’e iha loron 01 outubru 2019 ho rezultasaun votasaun a-favór 39. Ho rezolusaun ne’ebé arpovadu hosi Parlamentu Nasionál, ema ho difisiénsia sira hato’o keixa ba Komisaun A tanba la hetan atensaun hosi Governu.

Prezidente Komisaun A, Deputadu Joaquim dos Santos, simu ona keixa balun hosi sidadasaun sira liuliu ema ho defisiénsia sira Timor-Leste tanba durante ne’e ladún hetan protesaun hosi Governu.

“Problema agora ne’e tanbasá Governu la kumpre rezolusaun ne’ebé Parlamentu  hasai tiha ona maibé parese situasaun polítika mak obriga hodi la kumpre karik, tanba sira sente lakon direitu ida-ne’ebé hanesan sidadaun defisiente atu hetan protesaun hosi Governu. Purtantu, komisaun A estuda hela atu halo pareser ida ba Governu atu nune’e Governu implementa Parlamentu nia rezolusaun númeru 21/2019 ne’ebé rekomenda ba Governu atu tau-matan ba ita-nia sidadaun nasionál defisiente sira,” Deputadu Joaquim dos Santos, informa ba jornalista sira, iha Parlamentu Nasioná,, tersa ne’e.

Prezidente Komisaun A ne’e fó-sai katak rezolusaun ba ema ho defisiénsia sira aprova ona iha 2019 no iha tinan 2012 mós Governu hasai mós rezolusaun ida kona-ba polítika nasionál inkluzaun no promosaun direitu das pesoas com  defisiensias.

Nia haktuir, Ministrériu Solidaridade Sosiál no Inklusaun iha responsabilidade boot atu implementa rezolusaun Governu nian, tanba regra uluk sei moris Governu agora tenke aplika hodi bele garante sidadaun defisiente sira-nia direitu.

“Tanba ita-nia regra interna iha konstitusaun artigu 21 no mós define kona-ba atu halo protesaun ba sidadaun nasionál defisientes sira,” nia dehan. 

Nia esplika, iha artigu 9 mós halo ratifikasaun karik konvensaun internasionál kona-ba pesoa ho defisiente, entaun regra internasionál kuandu parlamentu nasionál ratifika sai regra interna entaun di’ak liután maibé seidauk iha.

“Se laiha konvensaun entaun ita atu husik deit ita-nia maun-alin sira  abandonadu ka ida-ne’e labele, tanba ita-nia lejizladór konstutuente mós hanoin ona tau ona iha artigu 21,” nia hateten.

Tanba ne’e, nia dehan, la presiza ona halo lei bara-barak maibé Governu bele hasai dekretu, tanba rezolusaun mós iha ona, Governu bele dekreta servisu ezekutivu ninian halo protesaun ba sidadaun defisiente sira-nian.

Nia fó hanoin ba Governu katak diskusaun Orsamentu Jerál Estadu (OJE) Governu tenke haree ona nesesidade polítika atu rezolve defisiente sira-nia moris, liuliu Ministériu Solidaridade Sosiál no Inkluzaun.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here