Ekipa MS hala’o hela screening masál iha área Fronteira. Imajen/Pilár III COVID-19.

DILI, 18 fevereiru 2021 (TATOLI)—Minsitériu Saúde (MS) rejista-tan kazu pozitivu COVID-19 na’in-ida no re-integra pasiente rekoperadu na’in 18 hosi sala izolamentu Vera Cruz ba família.

Koordenadór pilár VII COVID-19, Nilton da Silva fó sai asuntu ne’e liuhosi konferénsia imprensa ne’ebé hala’o iha salaun MS, Caicoli, kinta (18/02).

Notísia Relevante:Pasiente COVID-19 na’in-ida rekoperadu

“Komisaun nasionál prevensaun COVID-19 inkorpora-tan pasiente rekoperadu na’in 18 ba família tanba rezultadu negativu ona,” Doutór Nilton hateten.

Pasiente rekoperadu hirak ne’e, na’in-tolu hosi nasaun Tanzánia, na’in-rua  tama ilegál no na’in 13 mai hosi nasaun Indonézia liuhosi pontu-entrada Batugadé iha loron 20 janeiru 2021.

“Ita-mós rejista-tan kazu pozitivu foun COVID-19 Timoroan mane na’in-ida ho idade 28 ne’ebé asintomátiku no oras ne’e daudaun iha ona sala izolamentu Vera Cruz,” nia subliña.

História viajen pasiente ne’e, iha loron 4  fevereiru 2021 mai-hosi Londrés, Reinu Unidu ba Doha ho aviaun Qatar Airlines no iha loron 5 fevereiru hosi Doha ba Malázia, toba kalan ida iha Aeroportu Kuala-Lumpur, hafoin iha loron 6 fevereiru hosi Malázia mai Dili.

Iha Dili, sidadaun ne’e hela iha kuarentena Otél Carla Mension hamutuk ho pasajeiru na’in 16 ne’ebé ninia teste Swab foti iha loron 16 fevereiru ho rezultadu pozitivu no relata iha loron 18 fevereiru.

Dadus loron 18 fevereiru, komulativu teste 20.617, komulativu negativu 20.404, hein rezultadu 110, komulativu kazu 103, kazu foun ida, rekoperadu 18, komulativu rekoperadu  81+4 = 85, atuál baixa 22, kuarentena 228, Dili 149, Munisípiu 79. Auto-kuarentena 24, Dili haat, Munisípiu 20, pasa ona  loron 14 na’in 7.965, Dili 6.575 no Munisípiu 1.390.

Notísia Relevante:Timoroan ida pozitivu COVID-19, kazu aumenta ba 40

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here