Koordenadór pilár hitu COVID-19, Nilton da Silva. Imajen/Felicidade Ximenes.

DILI, 14 fevereiru 2021 (TATOLI)—Ministériu Saúde, iha domingu ne’e, detekta tan Timoroan ida ho COVID-19 pozitivu, tanba ne’e, kazu pozitivu aumenta ba ema na’in 40 ne’ebé daudaun ne’e halo izolamentu iha Sentru Saúde Vera-Cruz Dili no Rejiaun Administrativa Epesiál Oé-Cusse Ambeno (RAEOA).

“Ohin 14 fevereiru 2021 husi Komisaun Nasionál rejista tan kazu konfirmadu pozitivu COVID-19 Timoroan na’in ida. Pasiente ne’e mane ho idade 20, asimtomátiku,” Koordenadór Pilár VII COVID-19, Nilton do Carmo da Silva, informa ba jornalista liuhosi konferénsia imprensa, domingu ne’e, iha edifísiu Ministéiru Saúde,Palasiu Cinzas,Caicoli.

Nia esplika pasiente ne’e iha loron 5 fulan-fevereiru 2021sai husi Timor-Leste bá Atambua Indonézia ho ilegalmente hodi asiste família mate iha Atambua durante loron 5.

No iha loron 10 fevereiru, fila mai Timor-Leste liuhosi área Tunubibi nian Munisípiu Bobonaro.

“Iha Tunubibi nia bá Maliana Vila ho motór (ojek) maibé nia lakuñese, husi Maliana Vila kontinua viájen ba Postu Administrativu Bobonaro ho Angguna (transporte públiku). Iha Angguna laran iha pasajeiru hamutuk ema na’in 11 inklui motorista no ajudante,” nia hateten.

Nia dehan, to’o iha suku Lourba, Postu Administrativu Bobonaro, pasiente COVID-19 ne’e hamutuk ho pasajeru na’in haat tun husi karreta angguna hodi la’o bá Postu Administrativu Bobonaro Villa.

Durante hela iha Bobonaro, Timoroan ne’e hela mesak no laiha família mak hela hamutuk ho nia. Loron tuir mai komunidade iha área ne’ebá informa ba autoridade lokál nomós polísia ho parte vijilánsia Munisípiu foti kedas sidadaun ne’e mai eskuadra PNTL Maliana vila hodi hala’o investigasaun.

“Ramata tiha investigasaun iha 11 fevereiru ekipa vijilánsia Munisípiu nian lori sidadadun refere bá iha kuarentena Batugade  hodi halo Swab no teste foti 13 fevereiru no rezultadu pozitivu relata iha dia 13 fevereiru,” Nilton hateten.

Daudaun ne’e servisu vijilánsia Munisípiu Bobonaro no Autoridade Seguransa iha Maliana foti ona kondutór no ajudante hodi kumpre kuarentena obrigatóriu iha Batugade.

No ekipa sei buka tuir passajeiru hotu ne’ebé sae angguna hamutuk ho pasiente COVID-19 nune’e bele halo kuarentena obrigatóriu.

“Atu dehan de’it katak solusaun di’ak liu ba ita-nia komunidade no ita-nia nasaun Timor-Leste maka sidadaun hotu tenke hakmatek iha fatin, labele hakat fronteira tama no sai, tanba atetude ne’e sei lori perigu boot ba populasaun tomak iha Timor. Iha inísiu kedas COVID-19 ne’e mosu iha ita-nia rai to’o agora ho ita-nia serbísu maka’as ohin loron hodi laiha transmisaun iha komunidade. Maibé ho maneira ema ida-rua ne’ebé laiha responsabilidade, Transmisaun lokál ka transmisaun komunidade bele mosu iha tempu saida deit,” Nilton do Carmo da Silva informa.

Tuir dadus husi Ministériu Saúde, to’o domingu ohin, kazu komulativu hamutuk 102, kazu foun +1 no atuál baixa 40.

Jornalista:Nelson de Sousa

Editór:Agapito dos Santos 

PUBLISIDADEiklan

1 KOMENTÁRIU

  1. Ema atetudi hanesan nee rai lulik no matebian sira sei babeur,tamba sira nia ulun toos na lahadomi rai ida nee,ita baku no kastigo sira mos ladiak dalan maka tengki koalia duni hanesan nee.

HAKEREK NO HATÁN

Please enter your comment!
Please enter your name here