Embaixadór Uniaun Europeia (UE), Andrew Jacobs. Imajen TATOLI/Osória Marques.

DILI, 04 dezembru 2020 (TATOLI)—Embaixadór Uniaun Europeia (UE), Andrew Jacobs, hateten Uniaun Europeia kontinua iha kompromisu atu kombate violénsia bazea ba jéneru no violénsia hasoru feto no labarik feto iha mundu liuliu iha Timor-Leste (TL).

Notisia Relevante: FOKUPERS-ACbit haforte ekonomia sobrevivente liuhosi semináriu no bazár

Embaixadór Andrew Jacobs hato’o kompromisu ne’e relasiona ho kampaña loron 16 ativizmu ba feto no labarik feto iha Timor-Leste.

Diplomata ne’e temi apoiu ne’ebé Uniaun Europeia fó ba atu kombate violénsia bazea ba jéneru ne’e mak hanesan finanseira no téknika hosi nasaun parseiru no sosiedade sívil.

“Timor-Leste iha númeru violénsia kontra feto ne’ebé aas. Feto kuaze 60% hosi idade 15-49 ne’ebé mak sofre violénsia seksuál no fíziku hosi sira-nia namoradu no parseira rasik. Sofre mós hosi violénsia antes independénsia. Sira mós hasoru dezafiu iha relasaun ho saúde fíziku no mentál, estimasaun eskluzaun sosiál no falta asesu ba rekursu ekonómiku,” Andrew Jacobs hatete ba jornalista sira bianhira partisipa semináriu ho tema “Garante Ekonomia Baze Sustentável Ba Feto” iha salaun FOKUPERS, Farol, Dili, sesta ne’e.

Andrew Jacobs esplika, Uniaun Europeia hanoin katak labele iha dezenvolvimentu sustentável ne’ebé la ho feto.

“Ami labele alkansa ida-ne’e se ami la hapara maneira hotu-hotu hanesan violénsia hasoru feto no labarik feto hotu. Tanba ne’e UE serbisu makaas atu tau direitu feto nian iha Objetivu Dezenvolvimentu Sustentável,” nia subliña.

Tanba ne’e, liuhosi parseria ho Hivos, Fokupers no Acbit, Uniaun Europeia hakarak apoia Timor-Leste hodi reforsa katak sei hametin organizasaun sosiedade sívil lokál no organizasaun komunitária atu apoia feto sobrevivente no vítima violénsia atu promove re-integrasaun no asesu dezenvolvimentu ekonómiku.

Nia konsidera inisiativa ida-ne’e akontese iha distritu hitu mak hanesan Ainaro, Baucau, Dili, Ermera, Liquiça, Manufahi no Oé-Cusse, ho nia implementasaun hahú iha fevereiru, no sei kontinua to’o 2022, ho orsamentu rihun $625.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here