Sekretária Estadu Igualdade no Inklusaun, Maria Jose da Fonseca Monteiro de Jesus no Rede feto ho world vision lansa forum nasional “Hapara Violensia Hasoru Feto no Labarik Feto”, iha salaun katedral, kinta (18/02). Imajen Tatoli/Egas Cristovão.

DILI, 18 fevereiru 2021 (TATOLI)–Rede Feto no World Vision estabelese forum nasionál ba hapara violénsia kontra feto no labarik feto sira-ne’ebé hetan ona apoiu hosi UE-ONU nia inisiativa spotligth.

Notísia Relevante: 2019, SEII rejistu kazu violénsia doméstika-asédiu seksuál hamutuk 1.338

Prezidente Rede Feto, Yasinta Luzinha. Imajen TATOLI/Egas Cristovão.

“Liuhosi UE-ONU Inisiativa Spotligth Forum Nasionál hodi hapara Violénsia hasoru feto no labarik feto sira,ohin Rede Feto Timor-Leste ne’ebé parseria hamutuk ho World Vision Timor-Leste hodi fó dalan ba kolaborasaun no solidariedade ba grupu oioin ne’ebé servisu ba hapara violénsia hasoru feto no labarík feto sira,” Prezidente Rede Feto, Yasinta Luzinha, hateten iha ámbitu fórum hapara violénsia hasoru feto no labarik feto iha salaun Katedral Vila Verde, Dili, kinta ne’e.

Yasinta Luzinha hateten, Forum Hapara Violénsia Hasoru Feto no Labarik Feto sira, sei sai hanesan dalan foun ida atu hasa’e kapasidade, koñesimentu no pratíka di’ak kona-ba hapara violénsia hasoru feto no labarik feto sira no promove kolaborasaun entre grupu sira.

Prezidente Rede Feto ne’e afirma, Rede Feto Timor-Leste hanesan organizasaun sumbriña ida ba organizasaun feto 46 iha teritóriu laran tomak ne’ebé mak iha espesialidade, koñesimentu no esperiénsia hodi hapara violénsia kontra feto no labarik feto sira liuhosi kampaña sensibilizasaun, kampaña mídia, fornese uma mahon seguru, servisu médiku forénsiku sira, akonselamentu, asisténsia legál no empoderamentu ba sobrevivente.

“Ami servisu hamutuk ona ho Sekretária Estadu Igualdade Inkluzaun (SEII) ho ministériu sira seluk hodi implementa Planu Asaun Nasionál Violénsia Bazea ba Jéneru. Tanba ne’e, ami rekuñese katak hapara violénsia kontra feto no labarik feto la’ós deit responsabilidade hosi organizasaun feto sira-nian de’it,” nia dehan.

Maibé, nia hatutan, responsabilidade servisu hamutuk ho organizasaun mane sira, organizasaun juventude, mídia, líder komunitáriu, líder relijiozu, no lider Estadu sira mak atu bele hapara violénsia hasoru feto no labarik feto sira iha sosiedade.

Tanba ne’e, nia hateten, ohin Rede Feto hamutuk World Vision estabelese Fórum Nasionál hapara violénsia hasoru feto no labarik feto sira-ne’ebé hetan suporta hosi Uniaun Europeia liuhosi UN Woman ba inisiativa spotligth nian ho montante orsamentu hamutuk rihun $98,781,33 ba tinan ida-nian.

Nia haktuir, planu ida-ne’e sei implementa uluk iha Munisípiu Bobonaro, Ermera no Viqueque inklui Dili.

“Nune’e, ho apoiu hosi UN Women nu’udar ajénsia ONU nian hosi parséria ne’e halo parte ba esforsu sira hosi Inisiativa Spotlight nian, hodi esforsu involvementu feto sira-nian no organizasaun sosiedade sivil sira, atu nune’e sira bele influénsia no avansa ho forma ne’ebé efikásia liután ba oin hodi hapara violénsia sira,” nia dehan.

Nia hatutan, koñesimentu no akompañamentu sei enkoraja solidariedade no inisiativa komplementáría sira. Tanba, nia dehan, Fórum Hapara violénsia hasoru feto no labarik feto sira sei envolve organizasaun sosiedade sivíl hosi nível nasionál no munisipál.

Aleinde ida-ne’e, tuir nia, sei involve grupu direitu feto, organizasaun ema ho defisiénsia, asosiasaun  traballadór doméstika, lesbian, gay, biseksuál, transjéneru, interseksu (LGBT) no labarik-feto sira ne’ebé serbisu, hasa’e abilidade no kapasidade organizasaun nian hosi autór servisu ba hapara violénsia hasoru feto no labarik feto sira. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here