Julião Augusto Mausiri “Zebra Metan”. Imajen/Espesiál.

DILI, 15 fevereiru 2020 (TATOLI)–Pároko Párokia Sagrado Coração de Jesus Becora, Domingos Maubere, hateten veternu Julião Mausiri “Zebra Metan” nia isin-lolon mak lakon maibé ninia klamar no ninia istória funu nian sei la lakon.

Notísia Relevante: PN aprova votu pezár ba Saudozu Mausiri ‘Metan Zebra’

Amu Domingos hatutan, saudozu Mausiri nia klamar la lakon tanba ho nia istória funu-nian ne’ebé buras iha juventude sira-nia neon no sei hakerek iha Timor-Leste nia besi riti. Saudozu ninia luta no sakrifísiu ne’ebé todan durante luta ba libertasaun nasionál ne’e, lori nia klamar ba hasoru Aman Maromak hodi bele hetan fatin no naroman rohan laek iha lalehan.

“Matebian nia isin-lolon mak lakon iha ita-nia oin maibé ninia klamar no istória funu nia sei la lakon. Tanba, istória funu nian sei buras beibeik iha foinsa’e sira nia memória no istória ne’e rasik sei hakerek iha Timor-Leste nia besi riti no besi kro’at atu nia labele lakon,” Amu Domingos Maubere hateten iha nia omília bainhira prezide misa requiem ba saudozu Julião Mausiri “Zebra Metan” nia isin-mate iha igreja Sagrado Coração de Jesus Becora, Dili, segunda ne’e.

Iha selebrasaun misa requiem ne’e, Amu Domingos husu ba saudozu Zebra Metan ho nia maluk luta na’in sira seluk ne’ebé husik ona iha mundu ida-ne’e nia klamar, hodi tau matan fali ba rai doben Timor-Leste nia dezenvolvimentu.

“Ha’u husu saudozu Julião Mausiri ne’ebé oras ne’e daudaun hamutuk ona ho saudozu sira seluk hanesan Nicolau Loubato, Nico Conis Santana no sira seluk hotu ne’ebé la temi ida ba ida, imi-nia tulun hamutuk hodi fó tulun foinsa’e timoroan sira atu nune’e lori Timor-Leste ba dezenvolvimentu ida-ne’ebé di’ak liu,” nia dehan.

Hafoin misa ramata, saudozu Julião Mausiri ‘Zebra metan” nia isin-mate, família no juventude resisténsia sira lori ba haloot iha fatin hakmatek rohan laek nian iha Jardim dos herois Metinaro, Dili.

Notísia Relevante: Saudozu “Mausiri” nu’udar éroi ba libertasaun nasionál

Jornalista: Osória Marques

Editór:  Cancio Ximenes

 

HAKEREK NO HATÁN

Please enter your comment!
Please enter your name here