Iha maiu 1991, Delegasaun Juventude inklui Saudozu Metan Zebra ne’ebé lideradu hosi Eduardo Belo 'Gatot' ho koñesimentu Komandante Em Xefe Kay Rala Xanana Gusmão, hodi hasoru malu ho Sub Xefe Estadu Maiór David Alex iha Suku Samalari, Postu Administrativu Baucau Vila, Munisiu Baucau. Imajen/Espesiál.

DILI, 12 fevereiru 2021 (TATOLI)—Iha tinan 24 nia laran, nia involve-aan iha luta ba libertasaun nasionál hodi hadau Timor-Leste nia independénsia hosi rezime Soeharto nia ukun. Iha tinan 17 nia laran, nia luta atu liberta-aan hosi moras ne’ebé nia enfrenta maibé moras ne’e manan nia to’o nia iis kotu. 

Situasaun ida-ne’e akontese ba Eis Deputadu Lejizlatura dahuluk, Julião Mausiri ‘Zebra Metan’, ne’ebé lori tempu lubuk ida hodi luta hasoru ba nia moras rasik, to’o Moris Nia Nain ne’e mai hadau nia iha mundu ne’e, iha ninia rezidénsia Bidau Santana, Aldeia Sagrada Família, Dili, iha kinta (11/02) kalan iha tuku 23:07

Saudozu nia maun, Manuel Mausiri haktuir, saudozu Julião Mausiri ‘Zebra Metan’ hahú hetan atakasaun iha tinan 2004. Iha biban ne’e, família sira lori ba Hospital Nacional Guido Valadares (HNGV) maibé CT Scan ka Tomografia Komputadorizada laiha atu deteta ninia moras ne’e ho loloos.

Nune’e, moras ne’e lori ba junta médika ho desizaun ida dehan tensaun alta katak bele halo tratamentu iha fatin ne’ebé de’it. Maibé hosi observasaun família nian katak buat ida CT Scan ne’e importante tebes hodi haree nia kondisaun iha kakutak ne’e, kuandu laiha entaun família labele halo buat ida.

Nia haktuir, prosesu ne’e la’o lori tinan naruk. Entaun, iha 2017 saudozu monu dala-ida tán no lori ba konsulta ne’e, ninia diagnostika nafatin katak saudozu moras tensaun alta no kontinua baixa iha HNGV iha ICU ho tempu naruk tebes.

Saudozu Julião Mausiri “Zebra Metan”. Imajen/Espesiál.

“Iha 2017 ne’e, HNGV iha ona CT Scan ne’ebé deteta buat ruma iha nia kakutak maibé nia kondisaun la hanesan baibain ona. Todan. Ho kondisaun saúde ne’ebé ladi’ak, desizaun ikus haruka ba halo tratamentu iha Singapura maibé la halo operasaun ba nia kakutak. Maibé, iha tempu ne’e, konsege uza fiu ida hodi harahun buat balun iha nia kakutak laran ne’e,” nia haktuir.

Hafoin halo tratamentu iha Singapura, saudozu Mausiri fila-fali mai iha Timor-Leste maibé kondisaun saúde laiha mudansa. Ezemplu, nia haktuir, maske halo ona tratamentu maibé to’o saudozu sa’e aviaun mós araska tebes.

“Rekomendasaun hosi ospitál Singapura husu atu halo check up kada fulan-neen dala ida. Maibé, tama iha 2019 ne’e propagasaun pandemia COVID-19 invade mundu tomak, entaun defísil ba saudozu ba halo check up iha Singapura. Nune’e, família deside lori saudozu ba halo tratamentu iha HNGV maibé laiha mudansa ba nia saúde,” nia dehan.

Tanba ne’e, saudozu kontinua halo tratamentu iha HNGV no CT Scan lee hetan katak iha líkidu balun iha nia kakutak laran maibé ospitál la halo buat ida, tanba laiha aparellu apropriadu atu xupa sai líkidu ne’e.

“Prontu, ami família sukat ba laiha mudansa entaun família deside saudozu halo tratamentu iha uma de’it. Entaun tinan ida-resin nia toba de’it iha uma. Maibé ami kontinua bolu kolega enfermeiru ida mai konsulta iha uma de’it. Ikus liu, horisehik, ninia kondisaun saúde grave liu ona no horikalan tuku 23:07 nia hakotu iis. Kauza hosi nia mate ne’e, aumenta tán nia hetan torturasaun durante funu. Tanba, nia hetan pankada suku pontu hamutuk 19 iha nia ulun,” Manuel Mausiri informa ba jornalista sira, iha Bidau Santa Ana, Aldeia Sagrada Família, sesta ne’e.

Nia dehan, parte Komisaun Omenajen deside haloot iha Jardim dos Herois Metinaro no família mós konkorda tanba saudozu Julião Mausiri mós, iha nia moris tomak, nia hola parte iha luta ba libertasaun nasionál.

Entretantu, Deputadu Partidu Demokrátiku, Adriano do Nascimento, hato’o sentida kondolénsia kle’an ba família en lutada. Katak, durante Timor-Leste ukun rasik aan, saudozu Julião Mausiri hanesan deputadu Primeiru Lejislatura ne’ebé kontribui makaas ba Parlamentu Nasionál.

“Saudozu nu’udar mós deputadu iha Primeiru Lejizlatura no hanesan ema lutadór ida. Ami hosi PD mós sente triste tanba lakon líder di’ak ne’ebé hamutuk harii partidu ida-ne’e. Saudozu mós kontribui makaas ba parlamentu iha primeiru lejizlatura,” nia dehan.

Nune’e mós, Eis Deputadu Leandro Isaac, konsidera Julião Mausiri hanesan juventude rezisténsia ida-ne’ebé uza ninia moris juventude nian iha tempu rezisténsia to’o Timor-Leste manan ukun rasik-aan.

“Ha’u koñese di’ak tebes Julião Mausiri no Mausiri nu’udar éroi ida. Mausiri nia kontribuisaun ba luta to’o ukun rasik-aan ita konta la hotu. Inimigu buka Mausiri até iha laho nia ku’ak mós sira buka. Ha’u asiste Mausiri nia maluk rasik mak halo traisaun ba Mausiri no Mausiri tenke simu buat hirak ne’e hotu iha tempu rezisténsia,” nia haktuir.

Saudozu Julião Mausiri nia naran loloos mak Augusto Mausiri ‘Metan Zebra’. Nia moris iha fulan juñu 1965. Julião Mausiri kaben ho Olinda da Costa Kumau. Nia oan hamutuk na’in-lima maibé ida fila-hikas ba Aman Maromak no hela na’in-haat. Oan na’in-haat ne’e mak hanesan Viser Mausiri, Latoia da Costa Mausiri, Visal Carol Deus Mausiri no Vilson do Bikei Moniz Mausiri.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here