PN aprova votu pezár ba Saudozu Mausiri ‘Metan Zebra’
DILI, 15 fevereiru 2021 (TATOLI)–Parlamentu Nasionál (PN), ohin, aprova votu pezár ba saudozu Julião Augusto Mausiri ‘Metan Zebra’ hodi presta omenájen ikus.
Hafoin halo diskusaun ba saudozu nia kontribuisaun durante rezisténsia no kontribuisaun ne’ebé Eis Deputadu ne’e kontribui iha lejizlatura dahuluk.
Reprezentante Povu sira aprova votu pezár ne’e ho rezultadu votasaun a-favór 53.
“Ho nune’e votu pezár ba sauzodu ‘Metan Zebra’ aprovadu,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi Plenária Parlamentu Nasionál.
Parlamentu Nasionál aprova votu pezár ne’e molok mate-isin to’o iha resintu parlamentu nian.
Eis Deputadu Lejizlalatura dahuluk Julião Mausiri ‘Zebra Metan’ hakotu iis iha nia rezidénsia Bidau Santana, Aldeia Sagrada Família, kinta tuku 23.07 kalan.
Saudozu Augusto Julião Mausiri moris iha Dili, Camea, Postu Administrativu Cristo Rei, Munisípiu Dili, iha loron 17 fulan juñu tinan 1966.
Saudozu nia pai naran Mausiri (falesidu) no inan naran Clotilda Moniz (falesida). Saudozu nu’udar oan datoluk hosi maun-alin na’in-tolu (3) mak hanesan Manuel Mausiri, Maria Mausiri (falesida).
Julião Mausiri kaben ho Olinda da Costa Kumau ho oan na’in-lima maibé ida fila-hikas ba aman Maromak no hela oan na’in-haat. Oan na’in-haat ne’e mak hanesan Viser Mausiri, Latoia da Costa Mausiri, Visal Carol Deus Mausiri no Vilson do Bikei Moniz Mausiri.
Notísia Relevante: Saudozu “Mausiri” nu’udar éroi ba libertasaun nasionál
Jornalista: Evaristo Soares Martins
Editór: Cancio Ximenes
