Koordenadora Jerál Komisaun Nasionál Prevensaun COVID-19, Odete da Silva Viegas. Imajen Tatoli/Felicidade Ximenes.

DILI, 11 fevereiru 2021 (TATOLI)—Ministériu Saúde (MS) rejista tan kazu pozitivu COVID-19 na’in 14 no númeru baixa aumenta ba na’in 38, kompostu hosi sala Izolamentu Vera Cruz na’in 37, Rejiaun Administrativa Espesiál Oe-cusse Ambeno (RAEOA) na’in-ida.

“Komisaun nasionál rejista tan kazu konfirmadu pozitivu na’in 14 kompostu hosi feto na’in-ualu no mane na’in neen,”  Koordenadora Jerál Komisaun COVID-19, Odete da Silva Viegas, fó sai liuhosi konferénsia imprensa iha salaun Ministériu Saúde Caicoli, kinta (11/02).

Notísia Relevante:Ema estranjeiru na’in neen pozitivu COVID-19, pasiente aumenta ba 29

Hosi na’in 14 ne’e sidadaun estranjeiru na’in-rua no seluk Timoroan hotu inklui estudante na’in-hitu ho pesoál sáude na’in-ida. Entre sira ne’e, ida ne’ebé idade kiik-liu mak 20 no idade boot-liu mak 54 ne’ebé asintomátiku.

Na’in 12 mai hosi Indonézia hosi Provínsia ne’ebé la hanesan, iha 20 janeiru 2021, sira tama Timor-Leste liuhosi Pontu Entrada Batugede ho pasajeiru hamutuk na’in 118.

Iha Dili na’in 12 ne’e halo konfinamentu obrigatóriu iha Otél hirak ne’ebé governu prepara.

Ekipa vizilánsia halo teste swab dala-tolu ba na’in 13 ne’e iha 21 janeiru, 1 fevereiru no 9 fevereiru ne’ebé rezultadu teste hatudu katak pasajeiru hirak ne’e hetan kazu pozitivu COVID-19.

Entre na’in 14 ne’e na’in-ida nu’udár médiku ne’ebé durante ne’e halo atendimentu iha kuarentena otél Time Square no na’in ida mak tama mai Timor-Leste iha 23 janeiru 2021, sidadaun ne’e mai ho transporte públiku (Bus) hosi Provínsia Kupang, Indonézia bá Atambua.

Iha loron tuir-mai (24 janeiru) nia viajen hosi Atambua mai Timor-Leste liuhosi Pontu Entrada Batugade no ekipa liña frente simu no submete ba konfinamentu iha Batugade, Munisípiu Bobonaro.

Odete mós subliña katak, iha 24 janeiru serbísu vizilánsia Ministériu Saúde ba foti amostra swab dahuluk, depois 9 janeiru halo tan teste swab daruak nian no rezultadu pozitivu relata iha 10 fevereiru 2021.

“Ekipa ambulânsia evakua ona pasiente ne’e mai sentru Izolamentu Vera Cruz, Dili,” nia hateten.

Totál komunidade ne’ebé hala’o kuarentena iha Batugade hamutuk ema na’in 36 inklui pasiente pozitivu no na’in 35 seluk tama klandestina ka liuhosi dalan ilegál.

“Ohin Ministériu Saúde mós fó-sai tan pasiente rekoperadu COVID-19 na’in-lima hosi izolamentu Vera Cruz kompostu hosi feto na’in-tolu no mane na’in-rua, hosi na’in-lima rekoperadu ne’e, na’in-ida mak estranjeiru,” nia informa.

Pasiente rekoperadu hirak ne’e, Odete esplika sira nia teste ikus iha 8 no 10 fevereiru, hosi teste swab rezultadu negativu nune’e, ohin sira fila ona ba idak-idak nia família.

Dadus 11 fevereiru 2021, Komulativu Teste 19.919, komulativu negativu 19.717, hein rezultadu 102, komulativu kazu  100, kazu foun 14, rekoperadu 5, komulativu rekoperadu 62+4 = 66, atuál baixa 38, kuarentena  279 (Dili 169, Munisípiu 128), auto-kuarentena  118 (Dili 92, Munisípiu 26), pasa ona loron 14 na’in    29 kompostu hosi Vera Cruz 28 no RAEOA na’in-ida.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here