COVID-19.

DILI, 13 fevereiru 2021 (TATOLI)-Ministériu Saúde deteta tan timor-oan na’in-ida pozitivu CAVID-19. Ho nune’e aumenta númeru kazu pozitivu COVID-19 atuál baixa iha sala izolamentu iha Dili no Rejiaun Administrativu Oe-Cusse Ambeno (RAEOA) hamutuk na’in-39.

Koordenadora Jerál Komisaun Nasionál Prevensaun COVID-19, Odete da Silva Viegas. Imajen Tatoli/Felicidade Ximenes.

”Ohin, 13 fevereiru 2021, hosi komisaun nasionál rejista tan kazu foun ida hosi Timor-oan feto-ida ho idade  tinan 28.  Nia la hatudu sintoma signifika la iha isin manas, la iha mear,’’ koordenadora Jerál Komisaun Prevensaun COVID-19, Odete da Silva Viegas, informa liuhosi konferénsia imprensa iha Palásiu Sinzas, Caicoli, Dili, sábadu ne’e.

Notísia Relevante : Komisaun Interministeriál seidauk iha opsaun hili ai-moruk vasina COVID-19

Nia hateten, iha loron 28 janeiru 2021, Timor-oan ne’e ho nia-oan feto-ki’ik, tinan ida fulan hitu, sira na’in-rua  viajen hosi Atambua, Indonézia mai Timór deside liuhosi dalan ilegál ka klandestina iha área Memo nian Munisípiu Bobonaro. Bainhira to’o iha Maliana, inan ne’e konsege aluga motór ojek hodi lori sira na’in-rua atu mai liu Dili. Bainhira sira to’o iha Kuartél Unidade Patrullamentu Fronteira (UPF) Batugade nian hetan liuhosi pasa revista hosi ajente Polísia UPF no identifika katak sidadaun ne’e tama klandestina. Iha biban ne’e kedas UPF lori inan ho oan ne’e ba iha Kuarentena Batugade, Munisípiu Bobonaro.

Iha loron-ne’e, Odete Viegas informa, ekipa ba halo teste swab, rezultadu negativu   no iha loron 12 ekipa halo teste tan dala ida hafoin rezultadu pozitivu no fó sai ba públiku iha loron 13 fevereiru 2021.

Notísia Relevante : MS rejista kazu pozitivu COVID-19 na’in 14, baixa 38

“Inan pozitivu ho nia-oan daudaun ne’e iha ona izolamentu Vera Krús, maibé iha sala ketak la hamutuk ho pasiente sira seluk,” Odete hateten.

Kona-ba abitante ne’ebé kondús motór hanesan ojek tula pasiente ne’e, Odete informa, ekipa halo tiha ona investigasaun ho pasiente COVID-19 maibé nia dehan katak la koñese ema ne’e inklui mós númeru matrikula motór refere.

Dadus ba loron 13 fevereiru 2021 kumulativu teste hamutuk 20100, kumulativu negativu 19770, hein rezultadu 229, komulativu kazu 101, kazu foun +1 atuál ho baixa 39, rekuperadu    la iha, kumulativu rekuperadu 62+4 = 66, kuarentena 236; iha Dili 168, munisípiu 68, auto-kuarentena   79; Dili 60, Munisípiu 19, pasa ona loron  14    na’in-7845; iha Dili 6455 no  munisípiu 1390.

Jornalista  : Felicidade Ximenes

Editór        : Francisco Simões

HAKEREK NO HATÁN

Please enter your comment!
Please enter your name here