Ministra Saúde, Odete Maria Freitas Belo. Imajen /Egas Cristovão

DILI, 11 fevereiru 2021 (TATOLI)— Komisaun Interministeriál ne’ebé lidera hosi Vise-Primeira Ministra no Ministra Solidariedade Sosiál no Inkluzaun (MSSI), Armanda Berta dos Santos seidauk iha opsaun atu hili ai-moruk ba vasinasaun COVID-19 tanba sei hein rezultadu hosi desizaun Konsellu Ministru (KM).

“Membru Komisaun Interministeriál kontinua halibur informasaun ne’ebé bele halo justifikasaun iha enkontru Konsellu Ministru tuir-mai. Entaun, ita seidauk iha opsaun,’’ Ministra Saúde, Odete Maria Freitas Belo hateten ba jornalista sira hafoin enkontru Komisaun Interministeriál iha salaun MSSI Caicoli, kinta (11/02).

Notísia Relevante:Governu analiza hela tipu ai-moruk ba vasinasaun COVID-19

Nia mós informa katak, durante enkontru membru sira hosi Komisaun Interministeriál ne’e halo diskusaun barak-liu kona-bá tipu ai-moruk diak liu ba vasinasaun ne’ebé Governu Timor-Leste atu hili hodi hola.

“Alende AstraZeneca, iha diskusaun ne’e mosu ideia lubuk ida ne’ebé sita mós kona-bá ai-moruk vasina ne’ebé modernu-liu ho naran Pfizer,” nia subliña.

Ho rezultadu hosi diskusaun ne’e maka, Komisaun Interministeriál sei halo justifikasaun no aprezenta atu oinsá bele konvense Konsellu Ministru iha enkontru tuir-mai.

Ekipa Komisaun ne’e mós promete nafatin katak, sei halo advokasia ba komunidade kona-bá vasinasaun ne’e liuliu sei esplika atu ema hotu intende didiak, bainhira hetan ona aprovasaun hosi Konsellu Ministru (KM).

Notísia Relevante:Armanda ho ekipa hahú prepara ba vasinasaun AstraZeneca

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here