Imajen sítiu istóriku “Gua-7” Bercoli, Postu Administrativu Venilale, Munisípiu Baucau. Imajen/Espesiál.

DILI, 12 fevereiru 2021 (TATOLI)—Administradór Postu Administrativu Venilale, Munisípiu Baucau, Carlos Guterres, rejeita Kompañia Internasionál COVEC ne’ebé kaer konstrusaun estrada dirasaun Baucau-Viqueque ne’e sobu sítiu istóriku “Gua-7” iha área Bercoli nian.

Notísia Relevante: COVEC Hahú Hikas Konstrusaun Estrada Ligasaun Baucau-Viqueque Trosu 1

“Informasaun kona-ba Kompañia Internasional COVEC sobu sítiu istóriku Gua-7 ne’e, laloos. COVEC seidauk book ka sobu tanba foin hahú sobu hosi Caibulori. Maibé Caibuilori ne’e mós iha rai-ko’ak balun ne’ebé uluk Japaun sira kee hela iha fatin ne’e, ne’ebé lider komunitáriu sira tau hanoin hamutuk taka tiha ona. Ohin, ha’u telefone direta ba komunidade bainhira tama mai besik Gua-7, ita tenke mai hotu atu rezolve tiha problema sira-ne’e,” Carlos Guterres hateten ba Agência TATOLI liuhosi telefónika, sesta ne’e.

Dala ida tán, nia hatoo ba komunidade sira katak informasaun ne’ebé espalla iha mídia sosiál dehan COVEC sobu sítiu istóriku Gua-7 ne’e laloos, tanba kompañia foin mak hahú kee no haluan estrada hosi Caibuilori sa’e mai no seidauk to’o iha fatin istóriku Gua-7 nian.

“Tuir ha’u-nia hanoin, momentu ha’u tuir enkontru ho Xefe Suku Uma Ana Iku no Uma Ana Ulu, loloos fatin istóriku Gua-7 ne’e labele taka tanba fatin ne’e nu’udar patrimóniu mundiál no mós lei asegura fatin istóriku sira ne’e,” nia dehan.

Ko’alia kona-ba sítiu istóriku Gua-7 ne’e, nia dehan, hanesan fatin turizmu komunitária ka fatin turizmu ponténsia Postu Administrativu Venilale nian ne’ebé sai fatin turizmu ba futuru, entaun nia parte la autoriza atu sobu sítiu istóriku Gua-7 bainhira kompañia atu haluan estrada.

Entretantu, Xefe Suku Uma Ana Ulu, Postu Administrativu Venilale, Munisípiu Baucau, Vicente de Sousa Boavida, mós lia ida ho administradór hodi rejeita Kompañia Internasionál COVEC sobu fatin istóriku “Gua-7”.

“Informasaun kona-ba sítiu istóriku Gua-7 ne’ebé mak dehan sobu ne’e, laloos. Ha’u nu’udar lider komunitária iha fatin ne’e, rejeita totál ba imajen ne’ebé espalla no viral tebes iha rede sosiál ne’e. Maibé, kKompania ne’e sobu mak ko’ak ida iha Caibulori nian. Tanba, ami mós sei hanoin no planu atu tau Gua-7 sai fatin Turizmu Komunitária iha Postu Administrativu Venilale nian. Entaun, iha ne’e, só ami konserva Gua-7 de’it,” Vicente de Sousa Boavida hateten ba Agência TATOLI via telefónika, sesta ne’e.

Xefe Suku ne’e hateten, kona-ba Gua-7 ne’e parte autoridade komunitária hato’o ona ba Ministériu Obras Públika (MOP) no Prezidente Autoridade Munisípiu Baucau sesante katak Gua-7 sei Dezenvolve ba Turizmu Komunitária.

“Ami haruka ona karta ida MOP no Prezidente Autoridade atu husik dalan metru hitu ba Gua-7 ne’e, estrada labele halo besik ba fatin refere,” nia dehan.

Nia esklarese, daudaun ne’e Kompania Internasionál COVEC ne’ebé mak kaer obra dirasaun hosi Baucau ho Viqueque nian ne’e sobu mak ko’ak ida iha Caibuilori Bercoli nian, la’ós Gua-7 ne’e.

Xefe Suku Uma Ana Uulu ne’e hateten, rai-ko’ak Caibulori ne’e hanesan mós fatin poténsia ida ba Postu Administrativu Venilale nian, maibé rai-ko’ak ne’e tenke sobu tanba fatin ne’e atu loke luan estrada ne’e defisil uitoan tanba parte kraik ne’e liga ho mota.

“Ita laiha dalan alternativu seluk atu sobu rai-ko’ak Caibuilori ne’ebé mak sai hanesan mós fatin istóriku ka turizmu komunitária Venilale nian. Se ita hotu lakohi, entaun estrada loke oinsá. Tanba parte kraik nian ne’e liga ho mota. Nune’e ami na’in rua Xefe Suku Uma Ana Iku deside hodi taka rai-ko’ak iha Caibuilori ne’e hodi dezenvolve ita-nia fatin,” Xefe Suku ne’e hateten.

Notísia Relevante: COVEC Hahú Mobiliza Ekipamentu Konstrui Estrada Baucau no Viqueque

Konstrusaun estrada ligasaun Baucau-Viqueque atinje ona 25%

Jornalista : Osória Marques

Editór : Cancio Ximenes

HAKEREK NO HATÁN

Please enter your comment!
Please enter your name here