Diretór Jerál MOP, Rui Hernani. Imajen/Florencio Miranda Ximenes

DILI, 22 janeiru 2020 (TATOLI) – Diretór Jerál Ministériu Obra Públika (MOP), Rui Hernani F. Guterres, hateten kompañia China Overseas Engineering Group (COVEC) hahú mobiliza ekipamentu hodi konstrui estrada Baucau no Viqueque ho kilómetru 20 ne’ebé MOP liberta no entrega ona ba kompañia ne’e.

“Agora, iha kompañia COVEC halo hela faze mobilizasaun ekipamentu  atubele reabilita tanba ita entrega ona rai kilómetru 10 husi  Baucau bá Venilale no kilómetru 10 mós husi Venilale bá Viqueque”, Rui Hernani ba TATOLI iha knaar fatin Faról, ohin.

Diretór Jerál ne’e dehan reabilitasaun ne’e tenke pur etapa, tanba abitante barak afetada, ne’ebé ekipa Unidade Jestaun Projetu ka PMU-MOP halo identifikasaun uluk ba rai ne’ebé livre hodi entrega uluk ba empreza atu reabilita.

“Ita foin entrega kilómetru 20 tanba prosesu indenizasaun sira ne’e liuliu ba abitante afetadu sira ba obra ida ne’e, ne’ebé ita tenke hala’o prosesu ho neineik”, katak.

Nia salienta tuir loloos, Governu tenke hala’o identifikasaun ba rai no liberta hotu mak entrega ba empreza atu hala’o reabilitasaun, maibé prosesu identifikasaun dezde uluk kedan hanesan ne’e ona, entaun presiza reabilita fazeadamente.

“Ne’ebé ita identifika no liberta ona balun hanesan rai livre entaun entrega ba empreza, pois mak hala’o identifikasaun fazeadamente hodi entrega pedasuk-pedasuk ne’ebé através obra ne’e atrazadu tanba problema rai”, afirma.

Nune’e, ekipa PMU-MOP no liña ministeriál hahú finaliza ona konsulta públika no sei kontinua ba faze identifikasaun hodi fó kompensasaun atu empreza bele hala’o ona reabilitasaun.

Kona-ba ai-horis ne’e Ministériu Agrikultura mak responsabiliza, rai ne’e Terra no Propriedade no uma responsabilidade MOP nia ne’ebé hein identifikasaun dadus.

Antes ne’e, Koordenadór Jerál Tékniku PMU- MOP, António da Costa Cruz, hatete ekipa PMU halo ona sosializasaun ka konsulta públika ba rekizitu indenizasaun ho abitante afetada sira ba konstrusaun estrada Baukau bá Venilale no Venilale bá Viqueque.

Koordenadór Jerál Tékniku ne’e relata iha prosesu konsulta públika ne’e, ekipa PMU-MOP sosializa mós rekizitu ka padraun ne’ebé Governu iha atu fó kompensasaun ba abitante afetada sira.

Sobre totál abitante afetada, nia dehan finaliza konsulta públika mak foin iha dadus ba abitante hira no totál orsamentu hira mak presiza aloka ba indenizasaun.

Projetu konstrusaun estrada nasionál Baukau-Venilale no Venilale-Viqueque iha kilómetru 58-resin, ka’er husi kompañia COVEC ho orsamentu millaun $44 ho durasaun tinan tolu hahú husi agostu 2019 to’o fevereiru 2022. Enkuantu orsamentu ba projetu estrada ne’e fundu empréstimu husi Banku Aziátiku Dezenvolvimentu (ADB, sigla inglés).

Notísia relevante : MOP Entrega Uluk Rai Kilómetru 10 ba COVEC Hodi Hahú Konstrusaun Estrada

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here