Traballadór sira rona orientasaun husi Dirijente sira molok hahú konstrusaun estrada. sábadu (30/05). Imajen/Mídia-MOP

DILI, 31 maiu 2020 (TATOLI) – Kompañia Internasionál China Overseas Engineering Group (COVEC) hahú hikas konstrusaun estrada nasionál ligasaun Baucau bá Viqueque, trosu 1 ho dirasaun husi Kapitál Baucau ba Postu Administrativu Venilale.

Kompañia xineza ne’e hahú hikas konstrusaun iha loron sábadu (30/05), hafoin Timor-Leste livre husi surtu COVID-19, maibé traballadór sira mós sei kumpre nafatin regra Estadu Emerjénsia nian, liuliu mantein distánsia sosiál.

Diretór Jerál Ministériu Obra Públika, Rui Hernani, hateten empreza hahú konstrusaun ona tanba ekipa Unidade Jestaun Projetu (PMU, sigla inglés) liberta ona rai kilómetru 10 hodi entrega uluk ba kompañia COVEC.

“Governu liuhusi Ministériu Obra Públika (MOP) entrega uluk rai kilómetru 10 husi Baucau bá Venilale no atu entrega tan rai iha Venilale bá Viqueque mós ho kilómetru 10, ba empreza ne’e atu hahú reabilitasaun tanba rai ne’e livre ona husi abitante afetadu sira”, informa Diretór Rui ba Agência Tatoli, bia telefónika, domingu ne’e.

Diretór Jerál ne’e adianta, reabilitasaun ne’e presiza pur etapa tanba abitante barak maka afetadu husi obra, tanba ne’e ekipa PMU-MOP halo identifikasaun uluk ba rai ne’ebé livre maka entrega uluk ba empreza atu reabilita.

“Ita identifika no liberta ona balun hanesan rai livre entaun entrega ba empreza, hafoin hala’o identifikasaun fazeadamente hodi entrega pedasuk, tanba ne’e obra ne’e atrazadu oituan tanba problema rai”, nia akresenta.

Nune’e, Ekipa PMU-MOP no ekipa interministeriál hahú finaliza ona konsulta públika no sei kontinua ba faze identifikasaun hodi fó indemnizasaun, nune’e empreza bele hala’o ona reabilitasaun.

Antes ne’e, Koordenadór Jerál Tékniku PMU- MOP, António da Costa Cruz, hatete ekipa PMU halo ona konsulta públika ba rekizitu indemnizasaun ba abitante afetadu sira, ba konstrusaun estrada dirasaun Baucau bá Venilale no Venilale bá Viqueque.

Koordenadór Jerál Tékniku ne’e relata, iha prosesu konsulta públika ne’e, ekipa PMU-MOP sosializa mós rekizitu padraun ne’ebé Governu iha atu fó kompensasaun ba abitante afetada sira.

“Ita konsulta inan-aman sira ne’ebé afetadu hodi troka hanoin, atu kona ai-horis karik selu ho osan hira no kona uma karik ho osan hira, tanba kona ai-horis ne’e Ministériu Agrikultura no Peska mak atende no uma ne’e MOP mak selu tuir padraun ne’ebé iha ona”, nia esplika.

Sobre totál abitante afetada, nia dehan finaliza konsulta públika mak foin iha dadus ba abitante hira no totál orsamentu hira mak presiza aloka ba indemnizasaun.

Lansamentu fatuk dahuluk ba konstrusaun estrada nasionál ligasaun Baucau-Viqueque, trosu 1 Baucau bá Venilale, hala’o husi Ministru Obras Públika, Salvador Eugênio Soares dos Reis Pires, iha loron 9 agostu 2019.

Projetu estrada ho totál orsamentu hamutuk millaun $44, ho naruk kilómetru 58, kompostu husi trosu 1 kilómetru 23,38 dirasaun Baucau bá Venilale no trosu 2 kilómetru 34,62 ho dirasaun Venilale bá Viqueque.

Durasaun ba kontrusaun tinan-tolu, hahú husi agostu 2019 to’o fevereiru 2022.

Orsamentu ba Projetu estrada ne’e maihusi fundu empréstimu husi Banku Aziátiku Dezenvolvimentu (ADB, sigla inglés) no liuhosi konkursu públiku husi Komisaun Nasionál Aprovizionamentu no hetan ona vistu préviu husi Kámara Konta.

Konstrusaun ne’e rasik sei fó benefísiu ba populasaun iha uma-kain hamutuk 26.478 iha área konstrusaun

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here