Atividade joven na'in-tolu bainhira hili sasán uzadu hanesan kalen no besi-aat sira-ne’ebé soe iha lixeiru Tibar, sesta (5 /2/2021). Imajen Tatoli/Antonio Goncalves.

LIQUIÇA, 05 fevereiru 2021 (TATOLI)—Jestór Programa Fundasaun Dezenvolvimentu Komunidade Timor-Leste (FDCTL-sigla portugés), Tonito Soares, hateten fundasaun hamutuk ho komunidade Libaulelo lamenta ho importasaun lixu hosi Kapitál Dili no Ermera ne’ebé soe iha lixu-fatin Tibar.

Notísia Relevante: Pesoál saneamentu raut lixu tonelada 180 kada loron

“Ami hosi fundasaun hamutuk ho autoridade lokál no komunidade Aldeia Libaulelo Suku Tibar kestiona no lamenta tebes ho lixu ne’ebé mak durante ne’e importa hosi kapitál Dili no Munisípiu Ermera mai fakar iha lixu-fatin Tibar,” Tonito Soares hateten ba jornalista sira iha konferénsia imprensa iha Tibar, Liquiça, sesta ne’e.

Tanba, nia dehan, liuhosi importasaun lixu ne’e sei fó impaktu ba komunidade sira-nia saúde hodi hamosu moras sira hanesan pulmaun, vias respiratóriu, tuberkulose (TBC), tanba komunidade sira hela besik iha lixu-fatin Tibar nian.

Joven ida deskansa hela hafoin halo aktividade hili sasán uzadu hanesan kalen no besi-aat sira ne’ebé soe iha fatin-lixu Tibar, sesta (5 /2/2021). Imajen Tatoli/Antonio Goncalves.

“Ho observasaun ne’ebé ami iha katak, ho kondisaun hirak ne’e presiza tebes tau atensaun másimu hosi parte relevante sira. Liuliu órgaun ezekutivu nian atu buka solusaun hodi rezolve problema hirka ne’ebé mak komunidade Aldeia Linbaulelo enfrenta. Tanba, lixu hamosu inkonportável no insatisfasaun inklui prejudika komunidade sira-nia saúde,” nia hateten.

FDCTL hamutuk ho autoridade lokál no komunidade Aldeia Linbaulelo ejize ba Ministériu Administrasaun Estatál (MAE), ne’ebé mak nu’udar na’in ba asuntu refere hodi buka solusaun ida kona-bá kestaun lixu ne’e iha tempu badak nia-laran.

“MAE presiza halo konstrusaun moru hodi haleu ka hadulas lixu-fatin tanba tempu udan, ahi ne’ebé lakan iha lixu laran nunka mate no nia volume lakan kontinua aumenta hodi fó impaktu ba komuidade  sira-nia saúde,” nia fó sujestaun ba Governu.

Relasiona ho ambiente, nia mós rekomenda ba Sekretáriu Estadu Meiu Ambiente atu halo jestaun ba lixu ho kuidadu, nune’e labele fó implikasaun ne’ebé ladi’ak ba populasaun sira-nia saúde liuliu hanesan iha kondisaun saúde públiku no saneamentu públiku, ne’ebé mak oras ne’e dadaun komunidade hosi Aldeia Libaulelo, Suku Tibar enfrenta hela.

“Ami mós hatene katak Sekretáriu Estadu rasik iha ona polítika atu kombate lixu hahú husi zero plastiku ne’ebé mak agora daudaun emprezáriu balun hahú implementa ona hodi garantia ambiente limpu,” nia dehan.

Komunidade hamutuk ho FDCTL husu deputadu sira iha uma Fukun Parlamentu Nasionál liuliu komisaun asuntu saúde nian hodi halo rekomendasaun ba órgaun ezekutivu hanesan Governu sentrál hodi buka solusaun ba lixu ne’ebé mak oras ne’e soe iha área Tibar nian ho fó ambiente na’ebé ladi’ak ba komunidade sira iha ne’ebá

Nune’e mós, nia husu ba autoridade munisipál rua (2) hanesan Munisípiu Dili no Ermera atu buka alternativu ida hodi buka fatin seluk atu tau lixu iha fatin ne’ebé mak merese no dook hosi komunidade sira para garante ba ambiente saudável no hasees komunidade sira hosi moras perigozu sira.

“Tanba ne’e, iha biban ami husu na’i-ulun hanesan ukun-na’in sira-nia atensaun liuliu parte Governu atu tau konsiderasaun ho seriedade problema no preokupasaun ne’ebé mak ami nu’udar komunidade afetadu hosi importasaun lixu hodi lasente komfortável ho ami-nia ambiente rasık tanba prezensa hosi importasaun lixu ne’ebé importa hosi munisípu rua ne’e,” nia dehan.

Notísia Relevante: Ekipa Saneamentu Foti Foer Kada Loron Ida Retajen 150 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here