Ministru Petróleu no Minerál, Víctor da Conceição Soares. Imajen Tatoli/Egas Cristovão.

DILI, 11 fevereiru 2021 (TATOLI)–Ministru Petróleu no Minerál (MPM), Victor da Conceição Soares, hateten destinu prosesu dezenvolvimentu kadoras Greater Sunrise (GSR) sei iha faze negosiasaun tanba Austrália mós sai na’in.

Notísia Relevante: Timor Gap prioritiza “upstream” no “downstream” iha 2021

Victor da Conceição hateten, nível desizaun polítika ba destinu dezenvolvimentu kadoras Greater Sunrise kontinua la’o maibé tenke prioritiza uluk upstream, midstream hafoin tama ba downstream.

Tanba, tuir nia, upstream ne’e mak hatudu riku-soin ne’e iha ka laiha ka bolu estudu esplorasaun depois midstream no tama ba downstream.

Nia dehan, oras ne’e hahú ho upstream tanba ema dehan mina-matan iha-ne’ebá makaas.

“Ne’e ema konta de’it entaun ita-nia tékniku sira tenke tún ba ne’ebá atu haree ho Governu Austrália hodi ko’alia rejime Greater Sunrise ne’e. Maske delimitasaun fronteira marítima definidu ona maibé na’in ne’e Austrália ho Timor-Leste nian hotu, la’ós ita-nia mesak,” nia informa ba jornalista sira hafoin halo audisaun ho Komisaun C (Finansa Públika) kona-ba Konta Jerál Estadu (OJE) 2019 iha Parlamentu Nasionál, kinta ne’e.

Nia hateten, bazea ba ida-ne’e mak iha opsaun 80-20% no 70-30%.

“Desizaun saida mak ita atu halo iha-ne’ebá, primeiru tenke halo negosiasaun. Agora daudaun iha faze negosiasaun ba rejime espesiál Greater Sunrise. Rejime ne’e katak buat ne’e Timor-Leste no Austrália nian. Entaun Governu rua tenke hamutuk para halo lai lei tributária, regra no lei lubuk ida ke tenke halo hamutuk entre soberania rua ne’e,” nia tenik.

Nia dehan, bainhira lei hirak ne’e finaliza ona hafoin hatún ba kompañia konsórsiu sira-ne’ebé kompostu hosi Timor GAP, Woodside no Osaka Gas.

Nia fó-sai katak, polítika dada kadoras mai Timor-Leste daudaun ne’e sei iha meza leten hela.

“Se dada mai karik empreza tolu ne’e hetan benefísiu hotu ka lae. Manán hotu ka keta halo lakon karik. Ne’e empreza sira tenke diskute,” nia dehan. 

Oras ne’e, nia hatutan, Autoridade Nasionál Petróleu no Minerál (ANPM) reprezenta Estadu Timor-Leste kontinua halo diskusaun ho Austrália.

“Dada mai ne’e tenke tuir prosesu. Ita hanoin dada mai ne’e buat fásil ida karik. Ne’e kompromisu dezde governasaun dahuluk no tenke kontinua nafatin,” nia dehan.

Notísia Relevante: José Reis seidauk haree estudu viabilidade kona-ba dada kadoras mai TL

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here