Vise Peimeiru-Ministru no Ministru Planu no Ordenamentu, José Maria dos Reis. Imajen/VPM no MPO

DILI, 13 novembru 2020 (TATOLI)—Vise Primeiru Ministru no Ministru Planeamentu no Ordenamentu, José Reis, seidauk haree estudu viabilidade ruma kona-ba dada kadoras mai Timor-Leste.

“Señor Deputadu Arão até agora ha’u seidauk haree estudu viabilidade bele lori duni pipeline mai Timor-Leste ka lae. Ita seidauk iha tanba ita-nia akordu ida-ne’ebé mak ita halo (proporsaun) 70-30 bainhira dada mai Timor-leste no 80-20 dada ba Austrália. Signifika katak ita seidauk hatene loloos pipeline ne’e mai ka la mai,” Vise Ministru José Reis responde pergunta Deputadu Arao Noé, iha ámbitu audiénsia públika OJE 2021, iha plenária Parlamentu Nasionál, sesta ne’e.

Nia haktuir, bainhira iha Primeiru Governu Konstitusionál iha problema boot rua ne’ebé Governu hasoru katak ko’alia uluk fronteira ka ita ko’alia uluk Bayu Undan hodi halo dezenvolvimentu maibé desizaun intelijente hosi Primeiru Governu Konstitusionál  foti desizaun dezenvolve uluk Bayu Undan.

Nia dehan, se Timor-Leste ko’alia uluk fronteira, aban bainrua deve filafali hosi Austrália mak ko’alia fronteira entaun Timor-Leste susar boot.

Tuir nia haree no hatene projetu boot rua hanesan Suai Supply Base (SSB) no Auto Estrada ne’e ferramente importante maibé tenke lori pipeline mai Timor-Leste.

Vise Primeiru Ministru afirma, se Timor-Leste hakarak halo duni Auto Estrada ne’e para responde ba pipeline mai, dahuluk tenke hatene pipeline ne’e mai Timor-Leste ka lae nune’e fó prioridade hodi halo projetu auto estrada ne’e.

“Se ita mós sei dúvida hela ne’e komplikadu boot ba ita atu define. Lae, aban bainhira ita halo tiha, pipeline la mai, sala sé-nian. Tanba, ita atu halo auto estrada ida presiza iha retornu ke ita bele hetan,” nia fundamenta.

Maski nune’e, Vise Primeiru-Ministru ne’e hatene lideransa Timor nian hakarak pipeline mai iha Timor-Leste dezde akordu ne’ebé asina iha 2005 katak se Bayu Undan dada ona bá Austrália entaun Greater Sunrise tenke mai Timor-Leste.

“Ida-ne’e mai reforsa liután Xanana Gusmao ne’ebé durante luta hodi lori pipeline mai Timor-Leste.  Maibé presiza estudu viabilidade ida katak mai ka la mai, tanba ne’e mak ha’u diskute ona ho Primeiru-Ministru atu haree oinsá mak atu-bele halo rezolusaun ida para halo estudu viabilidade ida. Se mai duni saida de’it mak prevee ona iha projetu Tasi Mane ita la’o bá-oin. Se lae, ita hotu-hotu iha hela situasaun dúvida,” Ministru Planeamentu Ordenamentu ne’e hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here