Prezidente Timor Gap, António José Loiola de Sousa. Imajen Tatoli/Egas Cristvão

DILI, 17 novembru 202o (TATOLI)—Prezidente Timor Gap, António José Loiola de Sousa, hateten ba tinan fiskál 2021 prioritiza setór upstream no downstream iha ámbitu atividade óleu no gás.

Upstream hanesan atividade produsaun prinsipál ne’ebé buka fonte (esplorasaun) ho tékniku serta, enkuantu estrasaun (extrasi) nu’udar prosesu remosaun (penyeluaran) óleu no gás iha rai-okos ba superfísie (permukaan) no Upstream buka no hasai de’it.

Downstream nu’udar prosesu kontinuasaun hosi upstream, ne’ebé prosesa matéria-prima, tantu petróleu ka gás naturál sai matéria atu uza (bahan jadi). Setór downstream refere ba prosesu refinu petróleu brutu bo gás naturál, inklui halo distribuisaun materia atu uza (bahan jadi) no fa’an.

“Ba tinan 2021 nian, Timor Gap mai ho ninia proposta ida millaun $70.7 ne’ebé fokus liubá iha upstream no downstream,” Preziedente Timor Gap, António de Sousa, esplika liuhosi audiénsia públika ho Komisaun C (Finansa Públika) no Komisaun D (Ekonomia no Dezenvolvimentu), iha plenária Parlamentu Nasionál, tersa ne’e.

Nia fundamenta, razaun fó importánsia ba upstream tanba Bayu Undan ne’ebé ninia kontratu atu hotu no iha inserteza boot kona-ba rezerva hira mak sei iha mina-matan ne’e entaun Timor Gap tenke halo evaluasaun kle’an hodi fó opsaun ba Governu kona-ba Bayu Undan nia futuru, Governu sei deside, sera que bele dezenvolve ka halo desmantelamentu.

Nia hatutan, hosi millaun $70.7 ne’e barak liu previstu ba atu halo fornesimentu kombustível ba EDTL kuaze millaun $17,3 no ba Greater Sunrise nian maka oinsá mak Timor Gap tenke prepara estudu ne’ebé mak kle’an liu.

Nia dehan, dezáfiu no inserteza boot iha negosiasaun entre governu Timor-Leste no Autrália nomoos kompañia, ne’ebé tenke investe buat barak tanba rezultadu hosi fronteira marítima tenke priense kondisaun ekivalente.

“Ida-ne’e mak foin bele halo desizaun hodi bele dezenvolve Gretaer Sunrise,” hateten Prezidente Timor Gap.

“Atu garantia sustentabilidade fundu petrolíferu, Timor Gap mós durante tinan rua nia laran planu halo perfurasaun pelo menus posu rua iha rai-maran, risku iha maibé risku liu kuandu ita la foti desizaun,” Prezidente Timor Gap hateten.

Nune’e mós millaun $8,5, Timor Gap sei aloka ba operasaun iha Timor Gap rasik tanba to’o agora Timor Gap seidauk iha edifísiu no mós saláriu sira.

“Ba parte  downsteam nian, kontratu ida-ne’ebé sei asina ho EDTL kona-ba fornesimentu mina ne’e sei loke dalan ba Timor Gap atu investe garantia enerjétika no mós planu hosi Governu nian atu modifika ita-nia planta ba gás entaun estadu tenke hahú iha 2021 hafoin orsamentu ne’e aprova,” nia dehan. 

Maibé ida-ne’e mós sei fó implikasaun ba orsamentu Timor Gap nia iha 2022 katak Timor Gap garantia servisu fornesimentu EDTL nian ba tinan tolu, sei fó impaktu boot ba redusaun orsamentu Timor Gap nian.

“Projetu Tasi Mane importante tebes maibé ita tenke ajusta tuir ritmu ka progresu ida-ne’ebé hosi upstream nian kona-ba esplorasaun no produsaun. Estudu ne’ebé balu halo tiha ona, liuliu ba Greater Sunrise iha maibé tenke re-evalua fali liuliu kona-ba upstream nia parte katak imput hosi upstream maka sei determina loloos hosi lala’ok downstream nian,” Prezidente Timor Gap esplika.

Ezekusaun OJE 2020

Iha parte seluk, Prezidente Timor Gap ne’e fó-sai katak, OJE 2020 liuhosi rejime duodesimál hahú hosi janeiru to’o setembru millaun $12.7 ho ezekusaun 90% to’o fulan-setembru, fulan-outubru nian Timor Gap seidauk simu, karik iha fallansu balun.

“Ami halo iha 2020 nian fokus ba negosiasaun Greater Sunrise nomoos bloku sira-ne’ebé Timor Gap iha asaun (saham) iha rai maran nomoos iha tasi laran, Timor Gap mós konklui estudu merkadu no mapamentu ba kombutível iha territóriu nasionál, ne’ebé tuir mai sei implementa iha 2020-2021”, nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here